“O‘zkimyosanoat” jamiyati Shveysariya kompaniyasi bilan hamkorlikda 217 million dollarga teng azot kislotasi ishlab chiqaruvchi korxona qurmoqda. Bu haqda 4-mart, chorshanba kuni, “O‘zkimyosanoat” tomonidan “Navoiyazot” aksiyadorlik jamiyatiga uyushtirilgan press-turda ma’lum qilindi.
Bugungi kunda “O‘zkimyosanoat” aksiyadorlik jamiyati tarkibida 16 ta yirik va o‘rta kimyoviy korxona faoliyat ko‘rsatib kelmoqda. Ular tomonidan jami 180 tadan ortiq nomdagi kimyoviy mahsulotlar, shu jumladan, 90 ga yaqin turdagi yangi, mahalliy va xorijiy iste’molchilar tomonidan talab etilayotgan mahsulotlar ishlab chiqarilmoqda.
“Navoiyazot”da 70 dan ortiq noyob mahsulot ishlab chiqarilmoqda. Uni modernizatsiya qilish, quvvatini kengaytirish maqsadida uchta yirik investitsion loyiha rejalashtirilgan.
Birinchi loyihaning umumiy qiymati qariyb 1 milliard dollar bo‘lib, uning samarasida yiliga 660 ming tonna ammiak va 580 ming tonnadan ziyod karbamid olish imkoniyati yaratiladi. 500 ga yaqin ish o‘rni paydo bo‘ladi. Uni 2020-yilda ishga tushirish rejalashtirilgan bo‘lib, yiliga 136 million dollarlik mahsulot eksport qilish ko‘zda tutilgan.
Yaponiya kompaniyalarining konsorsiumi bilan hamkorlikda qurilayotgan yangi korxonada zamonaviy texnologiyalar qo‘llanishi evaziga yiliga 735 million kilovatt-soat elektr energiyasi tejaladi. Shu bilan birga, atmosferaga chiqadigan karbonat angidrid gazlari miqdori ham kamayadi.
Yana bir yirik korxona — Azot kislotasi ishlab chiqarish majmuasidir. Umumiy qiymati 217 million dollarga teng ushbu obyekt Shveysariya kompaniyasi bilan hamkorlikda bunyod etilmoqda.
Majmua yiliga 500 ming tonna mahsulot tayyorlash quvvatiga ega bo‘ladi. Hozirgi kunda uskuna va jihozlar o‘rnatilib, qurilish-montaj ishlari yakunlanmoqda. Yaqin kunlarda bu yerda birinchi mahsulot chiqarilishi rejalashtirilgan. Yangi loyihalarning foydalanishga topshirilishi natijasida qariyb 60 yil muqaddam qurilgan, har tomonlama eskirgan azot kislotasi sexlari foydalanishdan chiqariladi. Eng muhimi, mahsulot ishlab chiqarish uchun elektr energiyasi sarfi bir necha barobar kamayadi, havoni ifloslantiradigan 150 ming tonna miqdoridagi gazlar tutib qolinadi.
Uchinchi innovatsion loyiha — polivinilxlorid, kaustik soda va metanol ishlab chiqarish majmuasi yaqinda ishga tushirilgan edi. Loyiha Xitoy kompaniyalari konsorsiumi bilan hamkorlikda amalga oshirildi. Yangi korxonada yiliga 100 ming tonna polivinilxlorid, 75 ming tonna kaustik soda, 300 ming tonna metanol ishlab chiqariladi. Bu mahsulotlarga avtomobilsozlik, to‘qimachilik, metallurgiya, kimyo, neft-gaz tarmoqlari, elektr texnikasi va qurilish materiallari ishlab chiqarishda talab yuqori. Ular shu paytgacha katta valyuta evaziga import qilib kelinadi.
Polivinilxlorid, kaustik soda va metanol ishlab chiqarish majmuasi O‘zbekiston korxonalarini zarur xomashyo bilan ta’minlamoqda. Shuningdek, har yili 40 million dollarlik mahsulot eksport qilish rejalashtirilgan. Yangi majmuada 900 dan ziyod ish o‘rni yaratildi.
Tadbir doirasida “O‘zkimyosanoat” AJ Boshqaruv rasining korxonada faoliyat yuritayotgan yoshlar bilan uchrashuvi tashkil etildi. Yoshlar bilan o‘tkaziladigan ochiq muloqot davomida “Navoiyazot” AJ tizimida faoliyat yuritayotgan yoshlar bilan O‘zbekiston kimyo sanoatini yanada rivojlantirish va sohaga energiya tejamkor yangi innovatsion texnologiyalarni jalb qilish borasida takliflar o‘rtaga tashlandi.
Izoh (0)