«Ўзкимёсаноат» жамияти Швейцария компанияси билан ҳамкорликда 217 миллион долларга тенг азот кислотаси ишлаб чиқарувчи корхона қурмоқда. Бу ҳақда 4 март, чоршанба куни, «Ўзкимёсаноат» томонидан «Навоийазот» акциядорлик жамиятига уюштирилган пресс-турда маълум қилинди.
Бугунги кунда «Ўзкимёсаноат» акциядорлик жамияти таркибида 16 та йирик ва ўрта кимёвий корхона фаолият кўрсатиб келмоқда. Улар томонидан жами 180 тадан ортиқ номдаги кимёвий маҳсулотлар, шу жумладан, 90 га яқин турдаги янги, маҳаллий ва хорижий истеъмолчилар томонидан талаб этилаётган маҳсулотлар ишлаб чиқарилмоқда.
«Навоийазот»да 70 дан ортиқ ноёб маҳсулот ишлаб чиқарилмоқда. Уни модернизация қилиш, қувватини кенгайтириш мақсадида учта йирик инвестицион лойиҳа режалаштирилган.
Биринчи лойиҳанинг умумий қиймати қарийб 1 миллиард доллар бўлиб, унинг самарасида йилига 660 минг тонна аммиак ва 580 минг тоннадан зиёд карбамид олиш имконияти яратилади. 500 га яқин иш ўрни пайдо бўлади. Уни 2020 йилда ишга тушириш режалаштирилган бўлиб, йилига 136 миллион долларлик маҳсулот экспорт қилиш кўзда тутилган.
Япония компанияларининг консорциуми билан ҳамкорликда қурилаётган янги корхонада замонавий технологиялар қўлланиши эвазига йилига 735 миллион киловатт-соат электр энергияси тежалади. Шу билан бирга, атмосферага чиқадиган карбонат ангидрид газлари миқдори ҳам камаяди.
Яна бир йирик корхона — Азот кислотаси ишлаб чиқариш мажмуасидир. Умумий қиймати 217 миллион долларга тенг ушбу объект Швейцария компанияси билан ҳамкорликда бунёд этилмоқда.
Мажмуа йилига 500 минг тонна маҳсулот тайёрлаш қувватига эга бўлади. Ҳозирги кунда ускуна ва жиҳозлар ўрнатилиб, қурилиш-монтаж ишлари якунланмоқда. Яқин кунларда бу ерда биринчи маҳсулот чиқарилиши режалаштирилган. Янги лойиҳаларнинг фойдаланишга топширилиши натижасида қарийб 60 йил муқаддам қурилган, ҳар томонлама эскирган азот кислотаси цехлари фойдаланишдан чиқарилади. Энг муҳими, маҳсулот ишлаб чиқариш учун электр энергияси сарфи бир неча баробар камаяди, ҳавони ифлослантирадиган 150 минг тонна миқдоридаги газлар тутиб қолинади.
Учинчи инновацион лойиҳа — поливинилхлорид, каустик сода ва метанол ишлаб чиқариш мажмуаси яқинда ишга туширилган эди. Лойиҳа Хитой компаниялари консорциуми билан ҳамкорликда амалга оширилди. Янги корхонада йилига 100 минг тонна поливинилхлорид, 75 минг тонна каустик сода, 300 минг тонна метанол ишлаб чиқарилади. Бу маҳсулотларга автомобилсозлик, тўқимачилик, металлургия, кимё, нефть-газ тармоқлари, электр техникаси ва қурилиш материаллари ишлаб чиқаришда талаб юқори. Улар шу пайтгача катта валюта эвазига импорт қилиб келинади.
Поливинилхлорид, каустик сода ва метанол ишлаб чиқариш мажмуаси Ўзбекистон корхоналарини зарур хом ашё билан таъминламоқда. Шунингдек, ҳар йили 40 миллион долларлик маҳсулот экспорт қилиш режалаштирилган. Янги мажмуада 900 дан зиёд иш ўрни яратилди.
Тадбир доирасида «Ўзкимёсаноат» АЖ Бошқарув расининг корхонада фаолият юритаётган ёшлар билан учрашуви ташкил этилди. Ёшлар билан ўтказиладиган очиқ мулоқот давомида «Навоийазот» АЖ тизимида фаолият юритаётган ёшлар билан Ўзбекистон кимё саноатини янада ривожлантириш ва соҳага энергия тежамкор янги инновацион технологияларни жалб қилиш борасида таклифлар ўртага ташланди.
Изоҳ (0)