O‘zbekistonlik violonchelchi Dilshod Nazarovga musiqa asbobi sababli Toshkentdan Germaniyaga uchishga ruxsat berilmadi. Bu haqda Repost xabar berdi.
Ma’lum bo‘lishicha, 3-fevral kuni taniqli bastakor Anor Nazarovning o‘g‘li, O‘zbekistonning taniqli violonchelchisi Dilshod Nazarov otasining xotirasi sharafiga o‘tkazilgan ikkita bepul kontsertda qatnashish uchun O‘zbekistonga uchib kelgan.
Nashrning yozishicha, konsert Madaniyat vazirligi tashabbusi bilan bo‘lib o‘tgan hamda “O‘zbekiston” va “Toshkent” telekanallarida yoritilgan. Tadbirdan so‘ng, musiqachi Germaniyaga qaytishi kerak edi, ammo aeroportda sodir bo‘lgan voqea sababli buni amalga oshira olmadi. Toshkent xalqaro aeroporti bojxona xizmati musiqachiga go‘yoki O‘zbekistonning madaniy boyligi hisoblangan violonchelni mamlakatdan olib chiqib ketishga ruxsat bermagan.
https://www.facebook.com/dilshod.nazarov/videos/10158104672719708/
“Men hech qachon musiqa asbobini olib chiqish uchun ruxsat so‘ramaganman, asbob meniki ekanligini tasdiqlovchi hujjat talab qilinmagan” — deydi musiqachi.
Dilshod Nazarov bojxona xizmati vakiliga musiqa asbobi Respublikaning madaniy boyligi emasligini tushuntirishga uringan, chunki u avloddan-avlodga o‘tib kelgan. Kelib chiqishi Germaniyaga borib taqaladigan violonchelning tarixi 1974-yilda, musiqachining bobosi uni O‘zbekistonning birinchi violonchelchisi bo‘lgan qiziga sovg‘a sifatida sotib olgan paytdan boshlangan. Biroq, musiqachining so‘zlariga ko‘ra, asbob hech qanday moddiy ahamiyatga ega emas.
“Men o‘zim musiqachiman, buni tushunaman hamda bu musiqa asbobi madaniy va tarixiy ahamiyatga ega emas. Men uni chalganim uchun u ovoz chiqaradi, — deydi Dilshod Nazarov.
Repost’ning qayd etishicha, Vazirlar Mahkamasining 1999-yil 23-martda qabul qilingan “Madaniy boyliklarni olib chiqish va olib kirish tartibi to‘g‘risida”gi qaroriga binoan, ishlab chiqarilganiga 50 yildan oshgan musiqa asboblari O‘zbekistonning madaniy boyliklari hisoblanadi va tegishli ruxsatsiz Respublikadan tashqariga olib chiqilmaydi.
Bojxona va aeroport rasmiylari bilan uzoq davom etgan muzokaralardan so‘ng, musiqachi tegishli masalalar bo‘yicha mutaxassisni kutishi kerak bo‘ldi, ammo hech kim kelmadi. Mahalliy aviakompaniya vakillari parvozni kechiktirmasliklari haqida ogohlantirib, yo‘lovchilarni samolyotga chiqarishni tugatgan.
“Ozarbayjonda ham xuddi shunday vaziyat bo‘lgan. Men asbob o‘zimniki ekanligini aytganman, ular menga ishonmagan. Chalib berishim mumkinligini aytganimda, hamma kulib yuborgan. Biz aeroportda bo‘lgan mutaxassisni chaqirdik. Ular Madaniyat vazirligi bilan bog‘landi va vazirlik men konsertda qatnashganimni aytdi. Ular menga oq yo‘l tiladi va uzr so‘radi”, — deydi musiqachi.
Violonchelning pasporti taqdim etilganiga qaramay, musiqachi Germaniyaga ucha olmadi. U Germaniyada ikkita konsert o‘tkazishi kerak bo‘lgan.
Dilshod Nazarov “Il-de-Frans” xalqaro tanlovi laureati, Chaykovskiy nomidagi tanlov sovrindori, Oliy Parij konservatoriyasiga kirgan birinchi o‘zbekistonlik hisoblanadi. Shuningdek, u “Nihol” mukofoti sovrindori ham bo‘lgan.
Musiqachi o‘zining Facebook’dagi sahifasida bo‘lgan voqea haqida batafsil video yuklagan. U mazkur masalaga keng jamoatchilik e’tiborini jalb qilishga harakat qilmoqda.
Izoh (0)