“Xorazm xususiy bandlik agentligi” hamda “The Empire xususiy bandlik agentligi” MChJlarga O‘zbekiston Respublikasidan tashqarida ish izlayotgan shaxslarni ishga joylashtirish faoliyati bilan shug‘ullanish uchun berilgan litsenziyaning amal qilishi vaqtinchalik to‘xtatildi. Bu haqda O‘zbekiston Bandlik va mehnat munosabatlari vazirligi ma’lum qildi.
Qayd etilishicha, Bandlik va mehnat munosabatlari vazirligi huzuridagi Tashqi mehnat migratsiyasi agentligiga “Xorazm xususiy bandlik agentligi” MChJ faoliyati ustidan ko‘plab fuqarolardan shikoyat arizalari kelib tushgan.
Shu munosabat bilan, Bandlik va mehnat munosabatlari vazirligi O‘zbekiston Respublikasi Vazirlar Mahkamasining 2018-yil 12-sentabrdagi qarori asosida tasdiqlangan “O‘zbekiston Respublikasidan tashqarida ish izlayotgan shaxslarni ishga joylashtirish bo‘yicha faoliyatini litsenziyalash tartibi to‘g‘risidagi nizomining” 45-bandiga muvofiq, “Xorazm xususiy bandlik agentligi” hamda “The Empire xususiy bandlik agentligi” MChJ litsenziyasining amal qilishini 10 ish kuniga to‘xtatish to‘g‘risida qaror qabul qildi.
Ta’kidlanishicha, 10 kun davomida “Xorazm xususiy bandlik agentligi” hamda “The Empire xususiy bandlik agentligi” MChJ tomonidan nizomning 46-bandiga binoan keltirilgan holatlarni ijobiy hal qilish talab qilinadi.
Eslatib o‘tamiz, avvalroq International Job Organization xususiy bandlik agentligining Xorazm va Andijondagi xodimlarining firibgarliklari fosh etildi. Consort xususiy bandlik agentligiga O‘zbekistondan tashqarida ish izlayotgan shaxslarni ishga joylashtirish faoliyati bilan shug‘ullanish uchun berilgan litsenziyaning amal qilishi vaqtinchalik to‘xtatildi.
Bundan tashqari, Surxondaryoda “I.J.O.” xususiy bandlik agentligning fuqarolarni 2,6 milliard so‘mga chuv tushirgani aniqlandi. O‘zbekistonliklarni 24 milliard so‘mga chuv tushirgan Korean and migrations xususiy bandlik agentligining jinoiy ishi bo‘yicha tergov tafsilotlari ma’lum bo‘ldi. MIB Human xususiy bandlik agentligidan jabr ko‘rganlarga zararlarni qaytarishni boshladi.
Izoh (0)