Moliya vaziri o‘rinbosari Shohruh Shorahmedov bu borada Xalqaro moliya korporatsiyasi va boshqa xorijiy investorlar bilan muzokaralar olib borilayotganini ta’kidlagan. Bu haqda “Kun.uz” xabar berdi.
“Davlat ulushi bo‘lgan banklarning hammasi birdaniga xususiylashtiriladi, deb aytolmaymiz. Bu juda murakkab, vaqt talab qiladigan masala. Hozircha “Sanoat qurilish” bankka o‘xshagan yirik-yirik banklar haqida gapirishimiz mumkin. “Sanoat qurilish” bank (o‘tgan yili) London fond birjasida obligatsiyalarini chiqardi.
Ayni paytda “Ipoteka” bank faoliyatini isloh qilish harakatidamiz. Boshqa banklar bo‘yicha ham ishlar olib borilyapti. Yil oxiriga borib, investorlarni jalb qilishni boshlaymiz.
Vaqt o‘tishi bilan bu jarayonlar tezlashadi, deb o‘ylaymiz. Yaqin yillarda davlat ulushi bo‘lgan banklar to‘liq xususiylashtirilishi ustida ish olib borilmoqda”, – dedi Shorahmedov 4-mart kuni Xalqaro press-klubda.
2019-yili Moliya vazirligiga davlat ulushi yuqori bo‘lgan banklarni isloh qilish, ularga xorijiy investorlarni jalb qilish va xalqaro bozorga chiqarish bo‘yicha vazifalar yuklatilgan edi.
“Shuning uchun vazirligimizda maxsus boshqarma (Davlat ishtirokidagi tijorat banklarini isloh qilishni muvofiqlashtirish boshqarmasi) tashkil etilgan hamda ushbu masala vazir o‘rinbosarining funksiyalariga kiritilgan”, – degan vazir o‘rinbosari.
O‘zbekistonda strategik ahamiyatga ega korxonalardan tashqari, davlat ulushi mavjud barcha korxonalar bosqichma-bosqich xususiylashtirilishi e’lon qilingan.
2020-yildan boshlab mamlakat banklarida keng ko‘lamli transformatsiya dasturi amalga oshiriladi. 2020-yilda “Milliy” bank va “Ipoteka” bank ham o‘z yevrobondlarini chiqaradi.
Ustav kapitalidagi davlat aksiya paketlari (ulushlari) to‘liq xususiy sektorga sotilishi taklif etilayotgan banklar quyidagilar:
- “Poytaxt” bank AJ (hozirda davlat ulushi – 100 foiz)
- Asia Alliance bank ATB (100)
- “Turon” bank ATB (97,6)
- “Qishloq qurilish” bank ATB (96,5)
- “Asaka” ATB (95,9)
- AT “Aloqa” bank (94,2)
- “Sanoat qurilish” bank” ATB (89,1)
- “Ipoteka” bank ATIB (84,7)
- “O‘zagroeksport” bank ATB (75)
- “Ipak yo‘li” aksiyadorlik innovatsiya tijorat banki AJ (0,4)
- Trast bank XAB (0,1)
- Chet el kapitali ishtirokidagi “Hamkor” bank ATB (0,01)
- “Xalq” banki ATB (100)
- “O‘zbekiston Respublikasi Tashqi iqtisodiy faoliyat milliy” banki AJ (100)
- “Agro” bank ATB (94,3)
- “Mikrokredit” bank ATB (84,8)
Izoh (0)