Эски виолончель сабабли Ўзбекистоннинг таниқли мусиқачиси Тошкентдан Германияга учиб кета олмади

Ўзбекистонлик виолончелчи Дилшод Назаровга мусиқа асбоби сабабли Тошкентдан Германияга учишга рухсат берилмади. Бу ҳақда Repost хабар берди.

Маълум бўлишича, 3 февраль куни таниқли бастакор Анор Назаровнинг ўғли, Ўзбекистоннинг таниқли виолончелчиси Дилшод Назаров отасининг хотираси шарафига ўтказилган иккита бепул концертда қатнашиш учун Ўзбекистонга учиб келган.

Нашрнинг ёзишича, концерт Маданият вазирлиги ташаббуси билан бўлиб ўтган ҳамда «Ўзбекистон» ва «Тошкент» телеканалларида ёритилган. Тадбирдан сўнг, мусиқачи Германияга қайтиши керак эди, аммо аэропортда содир бўлган воқеа сабабли буни амалга ошира олмади. Тошкент халқаро аэропорти божхона хизмати мусиқачига гўёки Ўзбекистоннинг маданий бойлиги ҳисобланган виолончелни мамлакатдан олиб чиқиб кетишга рухсат бермаган.

https://www.facebook.com/dilshod.nazarov/videos/10158104672719708/

«Мен ҳеч қачон мусиқа асбобини олиб чиқиш учун рухсат сўрамаганман, асбоб меники эканлигини тасдиқловчи ҳужжат талаб қилинмаган» — дейди мусиқачи.

Дилшод Назаров божхона хизмати вакилига мусиқа асбоби Республиканинг маданий бойлиги эмаслигини тушунтиришга уринган, чунки у авлоддан-авлодга ўтиб келган. Келиб чиқиши Германияга бориб тақаладиган виолончелнинг тарихи 1974 йилда, мусиқачининг бобоси уни Ўзбекистоннинг биринчи виолончелчиси бўлган қизига совға сифатида сотиб олган пайтдан бошланган. Бироқ, мусиқачининг сўзларига кўра, асбоб ҳеч қандай моддий аҳамиятга эга эмас.

«Мен ўзим мусиқачиман, буни тушунаман ҳамда бу мусиқа асбоби маданий ва тарихий аҳамиятга эга эмас. Мен уни чалганим учун у овоз чиқаради, — дейди Дилшод Назаров.

Repost’нинг қайд этишича, Вазирлар Маҳкамасининг 1999 йил 23 мартда қабул қилинган «Маданий бойликларни олиб чиқиш ва олиб кириш тартиби тўғрисида»ги қарорига биноан, ишлаб чиқарилганига 50 йилдан ошган мусиқа асбоблари Ўзбекистоннинг маданий бойликлари ҳисобланади ва тегишли рухсатсиз Республикадан ташқарига олиб чиқилмайди.

Божхона ва аэропорт расмийлари билан узоқ давом этган музокаралардан сўнг, мусиқачи тегишли масалалар бўйича мутахассисни кутиши керак бўлди, аммо ҳеч ким келмади. Маҳаллий авиакомпания вакиллари парвозни кечиктирмасликлари ҳақида огоҳлантириб, йўловчиларни самолётга чиқаришни тугатган.

«Озарбайжонда ҳам худди шундай вазият бўлган. Мен асбоб ўзимники эканлигини айтганман, улар менга ишонмаган. Чалиб беришим мумкинлигини айтганимда, ҳамма кулиб юборган. Биз аэропортда бўлган мутахассисни чақирдик. Улар Маданият вазирлиги билан боғланди ва вазирлик мен концертда қатнашганимни айтди. Улар менга оқ йўл тилади ва узр сўради», — дейди мусиқачи.

Виолончелнинг паспорти тақдим этилганига қарамай, мусиқачи Германияга уча олмади. У Германияда иккита концерт ўтказиши керак бўлган.

Дилшод Назаров «Il-de-Frans» халқаро танлови лауреати, Чайковский номидаги танлов совриндори, Олий Париж консерваториясига кирган биринчи ўзбекистонлик ҳисобланади. Шунингдек, у «Ниҳол» мукофоти совриндори ҳам бўлган.

Мусиқачи ўзининг Facebook’даги саҳифасида бўлган воқеа ҳақида батафсил видео юклаган. У мазкур масалага кенг жамоатчилик эътиборини жалб қилишга ҳаракат қилмоқда.