Rossiyaning Yekaterinburg shahrida 2017-yilda janjal oqibatida o‘zining yo‘lovchisini o‘ldirgan o‘zbekistonlik taksichi Oybek Nosirov sakkiz yilga ozodlikdan mahrum qilindi. Bu haqda “Gorodovoy” xabar berdi.
Ma’lum bo‘lishicha, 2017-yilning may oyida kechki payt taksichi 29 yoshli yekaterinburglik erkakni o‘z manziliga olib borib qo‘yish bo‘yicha buyurtma olgan. Yo‘lovchi mast bo‘lgan va manziliga yetgach, yo‘l haqini to‘lashdan bosh tortgan.
Shundan so‘ng, taksichi va yo‘lovchi o‘rtasida janjal kelib chiqqan. Yo‘lovchi mashinadan chiqib ketgan, biroq haydovchi unga yetib olgan hamda uning ko‘kragi va boshiga otvyorka bilan zarba bergan. Yo‘lovchi tez yordam yetib kelguniga qadar voqea joyida vafot etgan. Qayd etilishicha, taksichi norasmiy ravishda ishlagan.
Xabar berilishicha, sud hukmi avvalroq chiqarilgan, biroq yuqori instansiya sudi uni bekor qilgan hamda ishni qayta ko‘rib chiqish uchun jo‘natgan. Takroriy sud ishi natijasida, o‘zbekistonlik taksichi sakkiz yilga ozodlikdan mahrum etilgan.
Avvalroq, Namanganda 74 yoshli ayolni urib o‘ldirgan qotil 20 yilga qamalgani haqida xabar berilgan edi.
Izoh (0)