Qoraqalpog‘iston Respublikasi Nukus shahrida 20 yoshli mast yo‘lovchi uni olib ketayotgan Lacetti haydovchisi mashinadan tushganidan foydalanib, avtomobilni olib qochdi va yo‘l-transport hodisasiga uchradi. Bu haqda Ichki ishlar vazirligi huzuridagi Tergov departamenti xabar berdi.
Ma’lum qilinishicha, 2020-yilning 29-fevral kuni kechki paytda 24 yoshli R.A. o‘zining Lacetti avtomashinasida 20 yoshli A.A.ni olib ketayotgan edi. R.A. soat 22:10 da Nukus shahri hududidagi avtovokzal yaqinida to‘xtab, avtomashinadan tushgan vaqtida, avtomashinada yo‘lovchi A.A. haydovchi yo‘qligidan foydalanib, avtomashinani olib qochgan.
Shundan so‘ng, A.A. Nukus shahar Koksul mahallasi hududida mashinani haydab ketayotib, boshqaruvini yo‘qotgan va yo‘l chetida ag‘darilib ketgan.
Mazkur holat yuzasidan Nukus shahar IIB huzuridagi Tergov bo‘limi tomonidan O‘zbekiston Respublikasi Jinoyat kodeksining 267-moddasi 1-qismi bilan (transport vositasini olib qochish) jinoyat ishi qo‘zg‘atilgan. A.A. gumon qilinuvchi tariqasida ishga jalb qilinib, o‘rnatilgan tartibda ushlangan. Dastlabki tergov davom etmoqda.
Avvalroq, Olmaliqda 2 nafar o‘smir olib qochgan Damas ularni quvgan YPX avtomobiliga urilib, ag‘darilib ketgan edi.
Izoh (0)