Oliy Majlis Senatining 28-fevral kuni bo‘lib o‘tgan ikkinchi yalpi majlisida ota-onalar qarovisiz qolgan, Mehribonlik uylarida tarbiyalangan yoshlarning jamiyatga ijtimoiy moslashuvidagi dolzarb masalalar to‘g‘risida hukumatga yuborilgan parlament so‘rovi natijasi ko‘rib chiqildi.
“Daryo” muxbiri Mirolim Isajonovning xabar berishicha, mazkur masala senatorlar tomonidan keng muhokama qilindi. Majlisda ishtirokchilar ushbu yo‘nalishga oid o‘z fikr, taklif va savollarini bildirdi.
“Bandlik va mehnat munosabatlari vazirligi vakiliga quyidagicha savolim bor edi. Mehribonlik uylari va bolalar shaharchalari bitiruvchilarini ish bilan ta’minlash bo‘yicha aniq manzilli dasturlar bormi? Bor bo‘lsa, bu dastur qanday ishlayapti, ijrosi qay darajada ta’minlanyapti? Umuman, bitiruvchi bolalarni ish joylaridagi mavjud qo‘nimsizlikning oldini olish bo‘yicha qanday ishlar qilinyapti?”, – deya savol bilan yuzlandi senator Minhojiddin Hojimatov
Ammo majlisda hukumat a’zolari orasida mazkur savolga javob beradigan odam topilmagani bois Senat raisi Tanzila Norboyevaning o‘zi javob qaytardi.
“Juda ham yaxshi savol! Marhamat, bandlik va mehnat munosabatlari vazirligidan kim keldi? Yo‘qmi hech kim? Yo‘q ekan!
Savolingizga javobni men berishim mumkin. Ularda bunday dastur yo‘q. Men bilaman. Chunki bu muammo bilan juda ko‘p yillardan beri shaxsan o‘zim shug‘ullanganman. Ularda umumiy dastur bor. Lekin Mehribonlik uylari bitiruvchilarini bo‘yicha qayerga joylash mumkin, qanday kasbga o‘qitish kerak, degan masala vazirlik kun tartibida yo‘q.
Shuning uchun bu masalani biz Senat qaroriga topshiriq sifatida yozamiz. Vazirlikdagilar yalpi majlisga nima uchun kelishmaganiga albatta aniqlik kiritish kerak va tushuntirishini olish lozim. Bosh vazirga xat yozamiz. Vazirliklarning mas’uliyati nima uchun bu ahvolda? Ko‘rilayotgan bu masala ularning masalasi. Faqat bizgami bu masala?”, – dedi Norboyeva.
Senat raisi parlament so‘roviga Vazirlar Mahkamasi tomonidan berilgan javob qoniqarli bo‘lmagani va sohada muammolar talayligini alohida aytib o‘tdi.
Yalpi majlisda, avvalo, qonunchilik bazasini mustahkamlash, ya’ni “Yetim bolalar va ota-ona qaramog‘idan mahrum bo‘lgan bolalarni ijtimoiy himoyalash to‘g‘risida”gi qonun loyihasini ishlab chiqish zarurligi qayd etildi. Bunda yetim bolalar va ota-ona qaramog‘isiz qolgan bolalarni oilaviy hamda bolalar muassasalariga joylashtirish tartibi va shakllarini aniq belgilash muhimligi bildirildi.
Shuningdek, bunday bolalarni davlat-xususiy sheriklik asosida tashkil etiladigan nodavlat oilaviy muassasalarga joylashtirishning huquqiy asoslarini yaratish zarurligi ta’kidlandi.
Avval 28-fevral kuni Senatning ikkinchi yalpi majlisi boshlangani, unda To‘ylarni ixcham o‘tkazish haqidagi yangi qonun korrupsiyaning ortishiga olib kelmasligi ma’lum qilingani, “O‘zbekiston Respublikasining fuqaroligi to‘g‘risida”gi qonunning ma’qullangani hamda Senat tomonidan Oliy sud sudyaligiga ikki nomzodning tasdiqlangani haqida xabarlar berilgan. Yalpi majlisda Senat raisi Tanzila Norboyeva O‘zbekistondagi kambag‘allik holati yuzasidan o‘z fikr-mulohazalarini bildirib, “Xalqimiz oriyatli, kambag‘allikni boshdan kechirsa ham birovga gapirmaydi”, – deb aytgan bo‘lsa, Samarqand viloyati hokimi, senator Erkinjon Turimov Mehribonlik uylarida tarbiyalangan yoshlarning jamiyatga ijtimoiy moslashuvidagi dolzarb masalalar to‘g‘risida gapirib, yetimlarning “bomj”ga aylanib, kimlarningdir “qurol”i bo‘lib qolyatgani achinarli holat ekanligini qayd etgan.
Izoh (0)