Олий Мажлис Сенатининг 28 февраль куни бўлиб ўтган иккинчи ялпи мажлисида ота-оналар қаровисиз қолган, Меҳрибонлик уйларида тарбияланган ёшларнинг жамиятга ижтимоий мослашувидаги долзарб масалалар тўғрисида ҳукуматга юборилган парламент сўрови натижаси кўриб чиқилди.
«Дарё» мухбири Миролим Исажоновнинг хабар беришича, мазкур масала сенаторлар томонидан кенг муҳокама қилинди. Мажлисда иштирокчилар ушбу йўналишга оид ўз фикр, таклиф ва саволларини билдирди.
«Бандлик ва меҳнат муносабатлари вазирлиги вакилига қуйидагича саволим бор эди. Меҳрибонлик уйлари ва болалар шаҳарчалари битирувчиларини иш билан таъминлаш бўйича аниқ манзилли дастурлар борми? Бор бўлса, бу дастур қандай ишлаяпти, ижроси қай даражада таъминланяпти? Умуман, битирувчи болаларни иш жойларидаги мавжуд қўнимсизликнинг олдини олиш бўйича қандай ишлар қилиняпти?», – дея савол билан юзланди сенатор Минҳожиддин Ҳожиматов
Аммо мажлисда ҳукумат аъзолари орасида мазкур саволга жавоб берадиган одам топилмагани боис Сенат раиси Танзила Норбоеванинг ўзи жавоб қайтарди.
«Жуда ҳам яхши савол! Марҳамат, бандлик ва меҳнат муносабатлари вазирлигидан ким келди? Йўқми ҳеч ким? Йўқ экан!
Саволингизга жавобни мен беришим мумкин. Уларда бундай дастур йўқ. Мен биламан. Чунки бу муаммо билан жуда кўп йиллардан бери шахсан ўзим шуғулланганман. Уларда умумий дастур бор. Лекин Меҳрибонлик уйлари битирувчиларини бўйича қаерга жойлаш мумкин, қандай касбга ўқитиш керак, деган масала вазирлик кун тартибида йўқ.
Шунинг учун бу масалани биз Сенат қарорига топшириқ сифатида ёзамиз. Вазирликдагилар ялпи мажлисга нима учун келишмаганига албатта аниқлик киритиш керак ва тушунтиришини олиш лозим. Бош вазирга хат ёзамиз. Вазирликларнинг масъулияти нима учун бу аҳволда? Кўрилаётган бу масала уларнинг масаласи. Фақат бизгами бу масала?», – деди Норбоева.
Сенат раиси парламент сўровига Вазирлар Маҳкамаси томонидан берилган жавоб қониқарли бўлмагани ва соҳада муаммолар талайлигини алоҳида айтиб ўтди.
Ялпи мажлисда, аввало, қонунчилик базасини мустаҳкамлаш, яъни «Етим болалар ва ота-она қарамоғидан маҳрум бўлган болаларни ижтимоий ҳимоялаш тўғрисида»ги қонун лойиҳасини ишлаб чиқиш зарурлиги қайд этилди. Бунда етим болалар ва ота-она қарамоғисиз қолган болаларни оилавий ҳамда болалар муассасаларига жойлаштириш тартиби ва шаклларини аниқ белгилаш муҳимлиги билдирилди.
Шунингдек, бундай болаларни давлат-хусусий шериклик асосида ташкил этиладиган нодавлат оилавий муассасаларга жойлаштиришнинг ҳуқуқий асосларини яратиш зарурлиги таъкидланди.
Аввал 28 февраль куни Сенатнинг иккинчи ялпи мажлиси бошлангани, унда Тўйларни ихчам ўтказиш ҳақидаги янги қонун коррупциянинг ортишига олиб келмаслиги маълум қилингани, «Ўзбекистон Республикасининг фуқаролиги тўғрисида»ги қонуннинг маъқуллангани ҳамда Сенат томонидан Олий суд судьялигига икки номзоднинг тасдиқлангани ҳақида хабарлар берилган. Ялпи мажлисда Сенат раиси Танзила Норбоева Ўзбекистондаги камбағаллик ҳолати юзасидан ўз фикр-мулоҳазаларини билдириб, «Халқимиз ориятли, камбағалликни бошдан кечирса ҳам бировга гапирмайди», – деб айтган бўлса, Самарқанд вилояти ҳокими, сенатор Эркинжон Туримов Меҳрибонлик уйларида тарбияланган ёшларнинг жамиятга ижтимоий мослашувидаги долзарб масалалар тўғрисида гапириб, етимларнинг «бомж»га айланиб, кимларнингдир «қурол»и бўлиб қолятгани ачинарли ҳолат эканлигини қайд этган.
Изоҳ (0)