O‘zbekiston xalq ta’limi vaziri Sherzod Shermatov o‘quvchilar sochi uzunligini chizg‘ichda o‘lchash bilan bog‘liq holat aks etgan va ijtimoiy tarmoqlarda tarqalgan suratlarga munosabat bildirdi.
Vazirning yozishicha, “Qosh qo‘yaman deb ko‘z chiqarish” maqoli aynan shu holatni yaxshi tasvirlaydi. “Hech qaysi topshiriqda bolalarning sochini chizg‘ichda o‘lchab, rasmga olib, Telegram’da tarqatish kerak deb yozilmagan. Kimdir qayerdadir juda qattiq ishlayotganini ko‘rsatish uchun shunday qilgan, shekilli”, — deydi vazirlik rahbari.
“Qani endi, ta’lim sifatini yaxshilash va o‘z malakasini oshirish bo‘yicha qarorlarni shunchalik jon kuydirib ijro etishsa joylarda”, — deya o‘z fikrini yakunlagan Sherzod Shermatov.
Eslatib o‘tamiz, Normativ-huquqiy hujjatlar loyihalari muhokamasi portaliga “O‘zbekiston Respublikasi hukumatining ayrim qarorlariga o‘zgartishlar va qo‘shimchalar kiritish to‘g‘risida”gi qaror loyihasi joylashtirilgan edi. Unda nodavlat ta’lim xizmatlari ko‘rsatish sohasidagi faoliyatni litsenziyalash tartibi to‘g‘risidagi nizom va “Davlat umumiy o‘rta ta’lim muassasalari o‘quvchilarini zamonaviy yagona maktab formasi bilan ta’minlash chora-tadbirlari to‘g‘risida”gi qarorlarga o‘zgartirish va qo‘shimchalar kiritish ko‘zda tutilgan.
Agar qaror loyihasi taklif etilayotgan tahrirda qabul qilinsa, nodavlat ta’lim xizmatlari ko‘rsatuvchi yuridik shaxslar o‘z faoliyatini amalga oshirishda ta’lim oluvchilarning kiyimlariga quyidagicha shartlar qo‘yishi kerak bo‘ladi:
- turli din va konfessiyalar hamda turli submadaniyatlarga mansublikni aks ettiruvchi elementlarni (hijob, kipa, kashaya, xoch va boshqalar) qo‘shishga hamda huquqni muhofaza qiluvchi organlar xodimlariga xos bo‘lgan harbiy va idoraviy formali kiyim-bosh kiyib yurishga yo‘l qo‘ymaslik;
- o‘g‘il bola ta’lim oluvchilarning tashkilotga tanasining ochiq qismiga tatuirovka tushirgan yoki pirsing qilgan, soqol qo‘ygan, sochi 2-3 santimetrdan uzun bo‘lgan va yorqin ranglarga bo‘yalgan holda kelishlariga;
- qiz bola ta’lim oluvchilarning tashkilotga tanasining ochiq qismiga tatuirovka tushirgan yoki pirsing qilgan, sochini yorqin ranglarga bo‘yagan, yuzini ko‘zga tashlanadigan darajada makiyaj qilgan, qulog‘iga bittadan ortiq sirg‘a taqqan, barmoqlariga uzuk taqqan, qo‘l tirnoqlarini bo‘yagan va uzun qilib o‘stirgan holda kelishiga yo‘l qo‘ymaslik.
Izoh (0)