Namangan viloyatida o‘zlarini DXX xodimi deb tanishtirgan to‘rt nafar kishi bir fuqaroning 150 ming AQSh dollari pulini firibgarlik yo‘li bilan o‘zlashtirib olgan. Bu haqda Ichki ishlar vazirligi matbuot xizmati xabar qilgan.
Namangan viloyati Chust tumanida 4 nafar firibgar shaxs jabrlanuvchining mashinasida 200 ming AQSh dollari borligini bilib qolgan va uni zimdan kuzatib yurgan. Qulay paytni poylab uning mashinasini to‘xtatib, o‘zlarini DXX xodimlari deb tanishtirgan va avtomobil egasi pullar unga tegishli emasligini, ularni boshqa fuqaroga yetkazib berishi kerakligini aytganiga qaramay undan ushbu pullarni talab qilgan.
Soxta DXX xodimlari jabrlanuvchi pullardan 150 ming dollar ajratsa, bu haqda hujjat rasmiylashtirmaslik va’dasini berib, uni ishontirishga uringan.
Pullarni berishni istamasang, “200 ming dollarni Qirg‘izistonga olib o‘tmoqchi bo‘lgan gumondor sifatida senga jinoyat ishi ochamiz, mashinangni musodara qilamiz”, — deya avtomobil haydovchisini qo‘rqitgan.
Haydovchi kerakli pullarni berib, o‘zi Qirg‘izistonga qochib ketgan. Pullarning egasi vaziyat bo‘yicha IIBga murojaat qilgach firibgarlar qo‘lga olindi va ularga qarshi jinoyat ishi ochildi, deyiladi “Voqea joyi” ko‘rsatuvidagi lavhada.
Izoh (0)