Prezident Shavkat Mirziyoyev 28-fevral, juma kuni, Yashnobod tumani rahbarlari, mahalla raislari, tadbirkorlar, maktab va sog‘liqni saqlash muassasalari vakillari bilan uchrashuv o‘tkazdi, deya xabar bermoqda davlat rahbarining matbuot xizmati.
“Sizlar bilan, xalq orasida yurib, islohotlarimizni amalga oshirayotgan odamlar bilan suhbat qilib, mavjud muammo va masalalarni ochiq-oydin muhokama qilgani keldim. Shuning uchun yodlangan gaplarni gapirmasdan, ko‘proq savol berib, takliflaringizni aytsangizlar, xursand bo‘laman”, — dedi uchrashuvda Shavkat Mirziyoyev.
Yashnobod tumanida 18 mingdan ziyod iqtisodiy faol aholiga ish o‘rinlari zarurligi, bandlikni oshirish uchun tadbirkorlikni jadal rivojlantirish kerakligi qayd etildi.
O‘tgan yili tumanda investitsiyalar 1,3 barobar, sanoat 12 foiz, qurilish 26 foiz, xizmat ko‘rsatish 28 foiz o‘sgan. 445 milliard so‘m sarmoya hisobidan 16 ta ishlab chiqarish va xizmat ko‘rsatish obyekti ishga tushirilgan.
2020—2022-yillar uchun qiymati 8,5 trillion so‘m bo‘lgan 61 ta investitsiya loyihasi shakllantirilgan. Kichik korxonalar tashkil etish uchun tumanda rezerv va imkoniyatlar yetarli ekani, mahalla instituti bu borada faollik ko‘rsatishi lozimligi ta’kidlandi.
Maktabgacha ta’lim muassasasi qurish, maktablarni kapital ta’mirlash, zamonaviy klinikalar tashkil etish bo‘yicha chora-tadbirlar belgilandi.
“Sog‘lom hayot tarzini shakllantirish, odamlarni ko‘proq doriga emas, balki to‘g‘ri ovqatlanishga, sportga o‘rgatish butun jamoatchilikning vazifasi bo‘lishi kerakligi qayd etildi”, — deya xabar bermoqda Prezident matbuot xizmati.
Jinoyatchilikning oldini olish, obodonlashtirish va infratuzilmani rivojlantirish bo‘yicha ham ko‘rsatmalar berildi. “Yashnobod o‘z nomiga munosib yashnab turishi, quyi tizimda ishni tashkil qilish bo‘yicha namuna bo‘lishi kerak”, — deya ta’kidlagan Shavkat Mirziyoyev.
Qayd etishlaricha, ochiq muloqotda aholi va tadbirkorlar o‘z fikr-mulohazalarini aytgan. Prezident takliflarni qo‘llab-quvvatlash va ularni amalga oshirish bo‘yicha mutasaddilarga topshiriqlar bergan.
Prezidentning Toshkent bo‘ylab 28-fevraldagi yurishi:
- Shavkat Mirziyoyev Mirzo Ulug‘bek tumanida qurilayotgan ko‘p qavatli uy-joylarni ko‘zdan kechirdi
- Shavkat Mirziyoyev Yashnobod tumanidagi texnoparkka tashrif buyurdi
- Shavkat Mirziyoyev Mudofaa vazirligining Ma’naviyat va ma’rifat markazini ko‘ngilochar maskanga aylantirish haqida topshiriq berdi
- Shavkat Mirziyoyev Yashnoboddagi Aviasozlar sport majmuasini borib ko‘rdi
- Shavkat Mirziyoyev Yashnoboddagi 22 ta kasbga o‘rgatadigan “Ishga marhamat” markazini borib ko‘rdi
Izoh (0)