Toshkent shahridagi “Y.C.” kompaniyasi mansabdor shaxslari va boshqalar jinoiy faoliyatdan olingan daromadlariga qonuniy tus berishga uringani aniqlandi, deya xabar bermoqda Bosh prokuratura matbuot xizmati.
Departamentning Toshkent shahar boshqarmasi tomonidan o‘tkazilgan tergovga qadar tekshiruvda aniqlanishicha, kompaniya mansabdorlari 2019-yilda 2,4 milliard so‘mlik xaridorgir tovarlarni naqd pulga sotib, faoliyati bo‘yicha hisobot topshirmay, 471,7 million so‘m miqdoridagi qo‘shilgan qiymat solig‘ini to‘lamagan.
Bosh prokuratura axborotida qo‘shimcha qilinishicha, gumon qilinuvchilar “jinoiy faoliyatdan olingan daromadlariga qonuniy tus berish maqsadida boshqa yangi korxonalarni tashkil etib, ularning nizom jamg‘armalarini noqonuniy daromadlari hisobidan shakllantirgan”.
Qayd etishlaricha, mazkur holat yuzasidan Jinoyat kodeksining tegishli moddalari bilan jinoyat ishi qo‘zg‘atilgan, tergov harakatlari o‘tkazilmoqda.
Izoh (0)