Ўзбекистон Соғлиқни сақлаш вазирлигида янги турдаги коронавирус инфекцияси бўйича эпидемик вазият ва касаллик тарқалишининг олдини олиш чора-тадбирларига бағишланган видеоселектор йиғилиши бўлиб ўтди, дея хабар бермоқда вазирликнинг Жамоатчилик билан алоқалар бўлими.
Йиғилишда, жумладан, Президент Шавкат Мирзиёев 29 январдаги «Ўзбекистон Республикасига коронавируснинг янги тури кириб келиши ва тарқалишининг олдини олиш юзасидан чора-тадбирлар дастурини тайёрлаш бўйича Республика махсус комиссиясини ташкил этиш тўғрисида»ги фармойишида кўзда тутилган вазифалар таҳлил қилинган.
Маълум қилишларича, Ўзбекистонга COVID-19 инфекциясининг кириб келишини олдини олиш мақсадида чегарадаги 53 та санитария-карантин пункти (СКП) халқаро талаб ва мезонлар асосида фаолият кўрсатмоқда. Бугунги кунда ушбу СКПларида бошқа тармоқ ходимлари қаторида 250 нафардан зиёд юқори малакали санитария-эпидемиология хизмати масъуллари белгиланган стандартлар бўйича иш олиб бормоқда.
«Юртимизга коронавирусни аниқлаш бўйича замонавий тест-системалари олиб келинган, шунингдек, тиббиёт ходимлари учун шахсий ҳимоя воситалари, тиббий техника ва тиббий буюмлар заҳираси яратилмоқда. Вазирлик ва Санитария-эпидемиологик осойишталиги агентлиги ҳузурида тун-у кун фаолият кўрсатувчи штаб ташкил қилинган. Жаҳон соғлиқни сақлаш ташкилоти билан мустаҳкам ҳамкорлик алоқалари ўрнатилган», — дейилади хабарда.
Маълумотларга кўра, 15 январдан 26 февралгача бўлган муддатда Хитойдан Ўзбекистонга келган 5 022 нафар фуқаро рўйхатга олинган бўлиб, уларнинг 14 кунлик тиббий кузатув даври якунланган. Ҳозиргача Ўзбекистонда коронавирус инфекцияси билан касалланиш ҳолати қайд этилмади.
«Аммо бундан хотиржам бўлишга асос йўқ, дейилди селекторда. Мамлакатимиздаги барча ҳаво ва темир йўлларда ташкил қилинган СКПлар, ҳудудларда тузилган штаблар фаолиятини бугунги кун талабидан келиб чиқиб, қайта кўриб чиқиш, меҳмонхоналар ва корхоналар, маҳалла, ички ишлар органлари билан мустаҳкам ҳамкорликни йўлга қўйиш ва уларга давлат томонидан қўйилаётган талаб, тавсияларни ўз вақтида етказиш, тиббий-патронаж хизматини янада яхшилаш юзасидан масъулларга аниқ топшириқ ва кўрсатмалар берилди», — дейилади вазирлик ахборотида.
Айниқса, эпидемия кенг тарқалган мамлакатлардан келган ҳар бир фуқарони тўлиқ 14 кунлик тиббий кузатувга олиш, бирламчи тиббиёт муассасаларининг врач ва патронаж ҳамширалари томонидан грипп, ЎРВИ ва ўткир пневмония касалликларини эрта аниқлаш ишларини тизимли ташкил этиш бўйича вазифалар яна бир бор қатъий кўрсатиб ўтилган.
Шу билан бирга, хориждан келган фуқаролар орасида тана ҳарорати кўтарилган беморлар аниқланганда, уларнинг барчасини коронавирус касаллигига махсус лаборатория текширувидан ўтказишга, шунингдек, касалликнинг тарқалишини олдини олиш ва изоляция қилиш мақсадида оилавий поликлиника шифокорлари томонидан ҳарорати юқори бўлган беморларга уйида тиббий ёрдам кўрсатилишига алоҳида эътибор қаратилиши таъкидлаб ўтилди.
Сўнгги маълумотларга қараганда, жаҳонда коронавирус инфекцияси билан касалланганлар сони 82 минг нафардан ошди, шундан 2 800 дан ортиқ ўлим ҳолати рўйхатга олинди. Ҳозиргача Хитойдан ташқари ушбу инфекция 50 га яқин давлатда аниқланди.
Изоҳ (0)