Олий Мажлис Сенатининг Хотин-қизлар ва гендер тенглик масалалари қўмитаси томонидан 27 февраль, пайшанба куни, ўтказилган навбатдаги мажлисда бир қанча масалалар муҳокама қилинди. Хусусан, қўмита аъзолари «Маҳалла тизими ходимлари кунини белгилаш тўғрисида»ги Ўзбекистон Республикаси қонунини дастлабки тарзда кўриб чиқди.
Мажлисда таъкидланишича, ушбу ҳужжатнинг ишлаб чиқилиши маҳалла институтини янада ислоҳ қилиш борасида қўйилган навбатдаги муҳим қадам бўлди. Қонунга кўра, 22 март — Маҳалла тизими ходимлари куни этиб белгиланиши кўзда тутилган.
Йиғилишда нутқ сўзлаган маҳалла ва оилани қўллаб-қувватлаш вазирининг биринчи ўринбосари Элмира Боситхонова мазкур қонуннинг қабул қилиниши маҳалла фаоллари учун рағбат, уларнинг юрт фаровонлиги йўлидаги хизматларининг ўзига хос эътирофи бўлишини айтиб ўтди.
Вазирлик расмийсининг фикрича, бундан буёғига МФЙ ходимларининг мажбурий меҳнат ва ваколатига кирмаган турли ишларга жалб қилинишига чек қўйилади.
«Эндиликда фуқароларнинг муаммолари маҳалла раиси ёки фаоллари елкасида қолмайди. Бу борада давлат ва жамоат ташкилотлари маҳаллага тиргак бўлади. Айтаётган гапларим баландпарвоз сўзлар эмас, ҳар бири босқичма-босқич бажариладиган вазифалар. Олдин раисларда битта ҳам ўринбосар йўқ эди. Ҳозир эса учта: хотин-қизлар, бандлик ва ҳуқуқ-тартибот масалалари бўйича ўринбосар лавозимлари жорий қилинди. Улар ваколатидан келиб чиқиб, вазифасини бажарган ҳолда мазкур масалалардаги муаммоларга ечим топади. Бу жараёнда вазирлик ҳам яқиндан ёрдамлашади.
Шуни алоҳида таъкидлаш жоизки, ўзини ўзи бошқариш органи ўз фуқаролари ва кенгашдан бошқа ҳеч кимга бўйсунмайди. Вазирликнинг ташкил этилишига сабаб бўлган энг катта омиллардан бири ҳам мана шу аслида. Бундан буён маҳалла раиси ва маҳалланинг кучли инсонларини ҳокимлар ҳамда бошқа ташкилотлар ўз ишига жалб қилолмайди, бунга чек қўйилади. Вазирлик ана шу аралашувлар, мажбуриятларга нуқта қўяди. Бу фармонда ҳам аниқ белгиланган. Ҳамма гап бизнинг ижройимизда. Фармонда белгиланган 32 та банднинг барчаси сўзсиз бажарилади. Мазкур жараёнда ҳаммамиз баравар ҳаракат қилишимиз керак, жумладан, оммавий ахборот воситалари ҳам», — деди Элмира Боситхонова, дея унинг сўзларини келтирмоқда «Дарё» мухбири Миролим Исажонов.
Изоҳ (0)