26 февраль санасида Европа Чемпионлар Лигаси 1/8 финали доирасида иккита беллашув бўлиб ўтади. Улардан бири Францияда кечади. Руди Гарсия шогирдлари ўз майдонида Криштиану Роналду етакчилигидаги «Ювентус»ни қабул қилади. Қуйида учрашувга жамоаларга қандай ҳолатда етиб келгани ва ўзаро учрашувлар тарихи ҳақида маълумотлар билан танишишингиз мумкин.
Мусобақа йўли
«Лион»«Лион» гуруҳ босқичида қийналгани рост. Французлар плей-офф йўлланмаси учун «Лейпциг», «Бенфика» ва «Зенит» билан курашга киришди. Дастлабки турда «Лион» ўз уйида «Зенит»ни қабул қилиб, 1:1 ҳисобида дуранг ўйнади. Иккинчи турда сафарда «Лейпциг»ни 2:0 ҳисобида мағлуб этиб, учинчи турда сафарда «Бенфика»га 1:2 ҳисобида имкониятни бой берди. 4-турда эса ўз уйида португалларни 3:1 ҳисобида таслим қилди. Санкт-Петербургда «Зенит»га қарши жавоб беллашувида 0:2 ҳисобида ютқазган французлар сўнгги турда ўз уйида «Лейпциг» билан 2:2 ҳисобида дуранг қайд этди. Жами 8 очкога эга бўлган «Лион» «Лейпциг»дан сўнг 2-ўрин билан плей-офф йўлланмасини қўлга киритди.
«Ювентус»Сарри шогирдлари эса гуруҳ босқичини сип-силлиқ ўтказди. «Атлетико», «Байер» ва «Локомотив» жой олган гуруҳда Турин суперклуби 6 та ўйиндан 5 тасида ғалаба қозонди. Фақат «Атлетико»га қарши 1-тур ўйинида дуранг қайд этилди — 2:2. Қолган барча баҳсларда Роналду ва унинг жамоадошлари ғалабани тантана қилди.
Жамоаларнинг айни дамдаги ҳолати
«Лион»«Лион» Франция чемпионатининг жорий мавсумини бир текисда ўтказаётгани йўқ. Буни жамоанинг ортда қолган 26 та турдан сўнг 37 очко билан 20 та жамоа орасида 7-ўриндан (10 та ғалаба, 7 та дуранг, 9 та мағлубият) жой олиб тургани орқали ҳам кўриш мумкин. Февраль ойида Руди Гарсия шогирдлари қуйидаги натижаларни қайд этди:- «Ницца»—«Лион» 2:1
- «Лион»—«Амьен» 0:0
- ПСЖ—«Лион» 4:2
- «Лион»—«Страсбург» 1:1
- «Мец»—«Лион» 0:2
«Ювентус»
Ўтган мавсумлардан фарқли ўлароқ «Ювентус» жорий йил А Серияда жиддий рақобатга дуч келмоқда. Тўғри, «Ювентус» бир амаллаб яна пешқадамликни қайтариб олди. Бироқ унинг ортидан «Лацио» ва «Интер» изма-из таъқиб қилиб келмоқда. Туринликлар 25-турдан сўнг 60 очко билан пешқадам бўлиб турган бўлса, 2-ўриндаги «Лацио»да 59, 3-поғонадаги «Интер»да эса 54 очко мавжуд.
«Ювентус»нинг февраль ойидаги натижалари эса қуйидагича:
- «Ювентус»—«Фиорентина» 3:0
- «Верона»—«Ювентус» 2:1
- «Ювентус»—«Брешиа» 2:0
- СПАЛ—«Ювентус» 1:2
Йўқотишлар
«Лион»Руди Гарсия жамоасида йўқотишлар сезиларли даражада. Жумладан, жамоа етакачиси Мемфис Депай узоқ муддатга сафдан чиққанлиги боис «Ювентус»га қарши баҳсда майдонга тушмайди. Шунингдек, қанот ҳимоячиси Рафаэл ҳам майдонга тушмайди. Жефф-Рене Аделаид ҳам Турин клубига қарши баҳсни ўтказиб юборади.
«Ювентус»
Ўйин қайдномасидан ўрин олган бўлса-да ҳали жароҳатдан тўлиқ тузалгани йўқ дея айтилаётган Дуглас Коста «Лион» билан баҳсни катта эҳтимол билан ўтказиб юборади. Шунингдек, узоқ муддатга сафдан чиққан Мериҳ Демирал ҳам французларга қарши баҳсда иштирок этмайди.
Ўзаро ўйинлар тарихи
«Лион» ва «Ювентус» ҳозирга қадар 4 марта ўзаро тўқнаш келган. Тўла устунлик Турин клуби тарафида. 3 ғалаба ва 1 та дуранг.Европа Лигаси 1/4 финали, 2013/14 йилги мавсум- «Лион»—«Ювентус» 0:1
- «Ювентус»—«Лион» 2:1
- «Лион»—«Ювентус» 0:1
- «Ювентус»—«Лион» 1:1
Ўйинолди фикрлар
«Плей-оффда фақат яхши жамоалар қолди. Кўпчилик «Ливерпуль» Мадридда, ПСЖ эса Дортмундда ғалаба қозонади деб ўйлаганди. Аммо улар буни амалга ошира олмади. Ўзимининг энг яхши ўйинимизни кўрсатишимиз ва «Ювентус»нинг 100 фоиз куч билан ўйнамаслигига умид қилишимиз керак. «Ювентус»нинг мақсади — Чемпионлар Лигасини ютиш, бизники эса бундай эмас. Бироқ футболда ҳамма нарса юз бериши мумкин», — дейди «Лион» устози Руди Гарсия.
«Лион» юқори тезлик ва кучли жисмоний тайёргарликка эга жамоа. Бу жуда хавфли жамоа, шундай экан ўзимининг яхши ўйинимизни кўрсатишимиз лозим. Агар яхшилаб эътибор берилса, бизнинг ярим ҳимоя ранг-барангликка эга. Олдиндан айтиб бўлмайди, лекин уч чизиқдан бирида жўшқинроқ ҳаракат қилиш бизга фойда беради деб ўйлайман. Криштиану — бутун дунё қадрлайдиган футболчи. Унинг жисмоний ҳолати ҳақида гапираётганда, шунчаки статистикасига қараш кифоя. Роналду жисмоний ва руҳий жиҳатдан қойилмақом ҳолатдаги футболчи», — дейди «Ювентус» бош мураббийи Маурицио Сарри.
Тахминий таркиблар
«Лион»: Лопеш — Маркал, Андерсон, Денаер, Тете — Ауар, Тузар, Терье, Траоре — Дембеле, Экамби
«Ювентус»: Шенсни — Алекс Сандро, Кьеллини, Де Лигт, Данило — Матюиди, Бентанкур, Рэмзи — Роналду, Игуаин, Дибала
Асрор Абдуназаров тайёрлади.
Изоҳ (0)