Наманган халқаро аэропортида коронавирус кириб келиш хавфини бартараф этиш бўйича ўқув машқи ўтказилди (фото)

Наманган вилоят соғлиқни сақлаш бошқармаси ташаббуси билан ҳамкор ташкилотлар иштирокида Наманган халқаро аэропортида коронавирус кириб келиш хавфини бартараф этиш бўйича махсус-тактик ўқув машқи ўтказилди. Бу ҳақда «Дарё» мухбири Азизбек Абдувалиев хабар бермоқда.

Ўқув машқига вилоят ва Наманган шаҳар ҳокимликлари, Соғлиқни сақлаш, Фавқулодда вазиятлар, Ички ишлар, Божхона бошқармалари, авиация хавфсизлиги тезкор гуруҳи, ҳарбий қисмлар, санитария-эпидемиология назорати осойишталиги маркази, Наманган халқаро аэропорти тузилмалари шахсий таркиби жалб этилди.

Машғулот дастури доирасида Наманганга самолётда учиб келган йўловчилар орасида коронавирусга чалинганлар борлиги ҳақида шартли равишда хабар тарқалди. Барча хизматлар оёққа турди. Дастлаб ҳаво кемаси дезинфекция қилинди. Махсус тайёргарликдан ўтган шифокорлар бемор йўловчиларни ажратиб олди. Улар орасида ҳомиладор аёл, жарроҳлик амалиётига эҳтиёж сезаётган ва юқумли касалликни бошидан кечираётган кишилар бор эди.

Улар ҳимоя либосидаги тиббиёт ходимлари кузатувида аэропортдаги белгиланган хонага олиб кирилди. Эпидемиолог, инфексионист ва бошқа мутахассислар беморлардаги касаллик аломатларини текшириб кўриб, уларни тезда шифохонага ётқизиш ҳақида тавсия берди. Коронавирусда гумон қилинган беморлар зудлик билан махсус санитар автомашиналарга олиб чиқилди ва шифохонага жўнатилди.

Тез тиббий ёрдам автомашиналари вилоят юқумли касалликлар шифохонаси томон йўл олди. Бу ерда замонавий тиббий асбоб-анжомлар, зурур дори-дармонлар билан таъминланган госпитал, изолятор ва обсерватор хоналари тайёрлаб қўйилган.

Шартли беморларга шошилинч тиббий хизмат кўрсатилди ва уларни даволаш ишлари бошлаб юборилди.

Жумладан, коронавирусга учраган беморга вилоят юқумли касалликлар шифохонаси шифокорлари, қорнида оғриқ сезган беморга РШТЁИМ Наманган филиали жарроҳлари, ҳомиладор аёлга эса вилоят перинатал маркази акушер-гинекологлари тиббий ёрдам кўрсатди.

Касалликка чалинганликда гумон қилинганлар вирус тарқатишининг олди олинди, хавф бартараф этилди.

— Машқда қийин бўлса, амалиётда осон кечади. Бугунги махсус-тактик ўқув машқида коронавирус эпидемияси тарқалган тақдирда нафақат тиббиёт ходимлари, балки барча тизимларнинг қандай ҳаракатланиши зарурлигини яна бир карра амалда синаб кўрдик. Фаолиятни янада такомиллаштириш зарурлигига амин бўлдик, — дейди вилоят соғлиқни сақлаш бошқармаси бошлиғи Солижон Мўминов.