Toshkentda sovrin jamg‘armasi 350 mln so‘mlik Xalqaro marafon musobaqasi bo‘lib o‘tadi

Toshkent shahrida 22-mart kuni “Navro‘z” bayramiga bag‘ishlab II Toshkent Xalqaro marafoni tashkil etiladi.

Jismoniy tarbiya va sport vazirligi rasmiy saytida ma’lum qilinishicha, II Toshkent Xalqaro marafonining umumiy mukofot jamg‘armasi 350 million so‘mni tashkil etadi. Katta marafon musobaqasi g‘olibi 30 million so‘m, yarim marafon musobaqasida 1-o‘rinni egallagan sportchi esa 12 million so‘m miqdorida pul mukofoti bilan taqdirlanadi. Umuman, har ikki masofada dastlabki sakkizta o‘rinni qo‘lga kiritgan sportchilar uchun mukofot belgilangan. Qolaversa, 3 km masofaga shaxsiy va jamoaviy hamda 1,5 km masofaga o‘tkaziladigan poygalarda o‘z guruhlarida sovrinli o‘rinni qo‘lga kiritgan sportchilar ham pul mukofoti bilan taqdirlanadi.

II Toshkent Xalqaro marafoni Xalqaro yengil atletika federatsiyasi tomonidan marafon yo‘nalishi bo‘yicha Tokio—2020 Olimpiadasiga reyting ochkolari taqdim etadigan musobaqalar qatoriga kiritilgan.

Eslatib o‘tamiz, Toshkent Xalqaro marafoni o‘tgan yili ham o‘tkazilgan va unda dunyoning 30 ga yaqin davlatidan vakillar ishtirok etgan bo‘lsa, bu safar musobaqalarga tashrif buyuruvchi davlat vakillari 50 tadan ortishi kutilmoqda.

Musobaqaning start-finish chizig‘i Afrosiyob va Beshyog‘och ko‘chalarining kesishuvida, “Humo Arena” muz saroyi oldida joylashgan.