Тошкент шаҳрида 22 март куни «Наврўз» байрамига бағишлаб II Тошкент Халқаро марафони ташкил этилади.
Жисмоний тарбия ва спорт вазирлиги расмий сайтида маълум қилинишича, II Тошкент Халқаро марафонининг умумий мукофот жамғармаси 350 миллион сўмни ташкил этади. Катта марафон мусобақаси ғолиби 30 миллион сўм, ярим марафон мусобақасида 1-ўринни эгаллаган спортчи эса 12 миллион сўм миқдорида пул мукофоти билан тақдирланади. Умуман, ҳар икки масофада дастлабки саккизта ўринни қўлга киритган спортчилар учун мукофот белгиланган. Қолаверса, 3 км масофага шахсий ва жамоавий ҳамда 1,5 км масофага ўтказиладиган пойгаларда ўз гуруҳларида совринли ўринни қўлга киритган спортчилар ҳам пул мукофоти билан тақдирланади.
II Тошкент Халқаро марафони Халқаро енгил атлетика федерацияси томонидан марафон йўналиши бўйича Токио—2020 Олимпиадасига рейтинг очколари тақдим этадиган мусобақалар қаторига киритилган.
Эслатиб ўтамиз, Тошкент Халқаро марафони ўтган йили ҳам ўтказилган ва унда дунёнинг 30 га яқин давлатидан вакиллар иштирок этган бўлса, бу сафар мусобақаларга ташриф буюрувчи давлат вакиллари 50 тадан ортиши кутилмоқда.
Мусобақанинг старт-финиш чизиғи Афросиёб ва Бешёғоч кўчаларининг кесишувида, «Humo Arena» муз саройи олдида жойлашган.
Изоҳ (0)