11-fevral, seshanba kuni, Toshkentning Yashnobod tumanida ayollarga mo‘ljallangan “Kunlik ishchilar markazi”ning ochilish marosimi bo‘lib o‘tdi, deb xabar bermoqda Mehnat vazirligi matbuot xizmati.
O‘zAning yozishicha, marosimda Oliy Majlis Senati a’zolari, Bandlik va mehnat munosabatlari vazirligi, Xotin-qizlar qo‘mitasi, Fuqarolarni o‘zini o‘zi boshqarish organlari vakillari ishtirok etdi.
Qayd etilishicha, tuman aholi bandligiga ko‘maklashish markazi huzurida filial shaklida tashkil etilgan mazkur shoxobchada ishchilarni yollash va ularni bir martalik ish bilan ta’minlash uchun barcha qulayliklar mavjud bo‘lib, unda ko‘rsatiladigan barcha xizmatlar bepuldir.
Xususan, asbob-uskunalarni ijaraga berish tizimi, arzonlashtirilgan ovqatlanish shoxobchasi faoliyati yo‘lga qo‘yilgan. Madaniy hordiq chiqarish uchun imkoniyatlar (kutubxona, shaxmat-shashka taxtalari) yaratilgan. Ko‘rsatilayotgan xizmatlar davlat tomonidan kafolatlanadi.
Xorij tajribasini o‘rgangan holda markazda vaqtinchalik ish bilan ta’minlashda autsorsing va autstaffing xizmatlari yo‘lga qo‘yilgan.
Izoh (0)