Ijtimoiy tarmoqlarda Andijon viloyati hokimi matbuot kotibi Mirzohid Botirovga tegishli ekani aytilayotgan yozishmalarning nusxasi (skrinshot) tarqalgani haqida xabar berilgan edi.
Unda Mirzohid Botirov o‘ziga tanish va ancha sinashta bo‘lgan boshqa foydalanuvchi bilan “dildan suhbat” qurgani anglashiladi. Haqorat-u uyatsiz gaplarga to‘la yozishmalarda gap aylanib, blogerlarga taqalgan paytda matbuot kotibi “...osmonga chiqayotgan blogerni joyini ko‘rsatib qo‘ygani”ni alohida ta’kidlab, “15 kunda mulla bo‘lgani”ga urg‘u beradi. Shuningdek, yozishmalarda o‘sha bloger “asakalik” ekani, “hokim tiq” degani uchun “tiqilgani”ni yozib bo‘lmas haqoratlar bilan bayon qilinadi.
Andijon viloyati hokimligi matbuot xizmati Mirzohid Botirovning akkaunti xakerlik hujumiga uchraganini xabar qilgan. Andijon viloyati prokuraturasi esa mazkur holat o‘rganilayotganini ma’lum qilgan edi.
Bosh prokuratura matbuot xizmati rahbari Hayot Shamsutdinovning “Daryo”ga ma’lum qilishicha, holat yuzasidan jinoyat ishi qo‘zg‘atilgan.
Xabar berilishicha, Andijon viloyati hokimi matbuot kotibi Mirzohid Botirovga tegishli ekani aytilayotgan yozishmalar yuzasidan tergov-tekshiruv harakatlari o‘tkazilishi lozimligini hisobga olgan holda mazkur holat yuzasidan O‘zbekiston Respublikasi Jinoyat kodeksining 139-moddasi (Tuhmat) va 140-moddasi (Haqorat qilish) bilan jinoyat ishi qo‘zg‘atilib, tergov harakatlari olib borilmoqda.
Andijon viloyati prokuraturasi tomonidan ma’lum qilinishicha, ijtimoiy tarmoqlarda tarqalgan Andijon viloyati hokimi matbuot kotibi Mirzohid Botirovga tegishli ekani aytilayotgan yozishmalar yuzasidan tergovoldi tekshiruv o‘tkazilgan.
Mazkur holat yuzasidan bir qator tergov harakatlari olib borilishi lozimligini hisobga olingan holda Jinoyat kodeksining 139 va 140-moddalari bilan jinoyat ishi qo‘zg‘atilgan.
Hozirda jinoyat ishi yuzasidan Andijon viloyati IIB tomonidan tergov harakatlari olib borilmoqda. Jinoyat ishi yuzasidan tergov Andijon viloyati prokuraturasi tomonidan alohida nazoratga olingan.
Avvalroq Andijon shahar hokimligi matbuot xizmati rahbari Gulshanoy Qoshqarovaga nisbatan u Andijon shahar hokimligining rasmiy Telegram kanali orqali jurnalist-bloger Xurshid Daliyevni haqorat qilib, unga nisbatan tuhmat qilgani uchun Ma’muriy javobgarlik to‘g‘risidagi kodeksning 40-moddasi (Tuhmat, ya’ni bila turib yolg‘on, boshqa bir shaxsni sharmanda qiluvchi uydirmalarni tarqatish) bilan ma’muriy ish qo‘zg‘atilgani va ish sudga oshirilgani haqida xabar berilgan edi. Sud Ma’muriy javobgarlik to‘g‘risidagi kodeksning 34-moddasiga asosan Gulshanoy Qoshqarovaga uzil-kesil bazaviy hisoblash miqdorining 25 baravari miqdoridagi 5 million 575 ming so‘m jarima jazosi tayinlagan edi.
Izoh (0)