Xorazmda MIBning Yangiariq tumani bo‘limi avtohalokatga uchragan fuqaro foydasiga haydovchidan 29 million so‘m undirib berdi. Bu haqda “Daryo”ga MIB matbuot xizmati xabar berdi.
Ma’lum bo‘lishicha, tibbiyot sohasida faoliyat ko‘rsatib kelayotgan fuqaro Z.Mamatrizayeva xizmat zarurati bilan Yangiariq tumaniga yetib kelish maqsadida Urganch—Yangiariq yo‘nalishida S.Yusupov boshqaruvidagi Cobalt’da ketayotganida haydovchining qo‘pol xatosi tufayli YTH sodir bo‘lgan.
Oqibatda mashinada bo‘lgan boshqa yo‘lovchilar qatori Z.Mamatrizayeva qattiq shikastlanib, og‘ir ahvolda Yangiariq tumani tibbiyot birlashmasiga yotqizilgan.
O‘tkazilgan tibbiy muolajalar natijasida Z.Mamatrizayeva qayta oyoqqa turgan va kasalxonada davolanish vaqtida biron marta xabar olmagan S.Yusupovning qilgan harakatlari natijasida o‘ziga yetkazilgan zararlarni undirish maqsadida sudga murojaat qilgan.
Sud qaroriga asosan, avtohalokat natijasida fuqaro Z.Mamatrizayevaga yetkazilgan, ya’ni yo‘qotilgan ish haqi uchun 10,4 million so‘m, dori-darmon sotib olish xarajatlari uchun 9,1 million so‘m hamda ma’naviy zarar uchun 10,0 million so‘m, jami 29,4 million so‘m S.Yusupovdan undirilishi belgilangan.Mazkur sud qarori bo‘yicha qarzdor S.Yusupov Byuro xodimlarining qonuniy talablarini bajarmaslik uchun turli xil aldov yo‘llarini qilib, har xil bahonalar izlagan.
Biroq sudning qarorini to‘liq bajarish maqsadida MIBning Yangiariq tumani bo‘limi davlat ijrochilari o‘z vakolatlari doirasida Z.Mamatrizayevaning buzilgan huquqlarini tiklab, haydovchidan uning foydasiga 29,5 million so‘mni to‘liq undirib bergan.
Izoh (0)