Rossiyaning “Sankt-Peterburg” bankining Moskva filiali O‘zbekistonga temir yo‘l transporti uchun uskunalar yetkazib berishga ixtisoslashgan “VLK” MChJga xalqaro bank kafolatini taqdim etdi. Bu haqda “Fontanka.ru” xabar berdi.
Ma’lum qilinishicha, kompaniyaga tenderlarda ishtirok etish va shartnoma majburiyatlarini bajarish uchun 2,5 million yevrodan ortiq miqdordagi bank kafolati taqdim etildi.
“VLK” MChJ temir yo‘l qurilmalarini yetkazib berishga ixtisoslashgan bo‘lib, mahsulotlar tarkibiga lokomotivlar, ular uchun ehtiyot qismlari, shuningdek, butlovchi qismlar kiradi.
Eslatib o‘tamiz, 2019-yilda Rossiyaning “Transmashxolding” kompaniyasi tarkibiga kiruvchi “Metrovagonmash” AJ Toshkent metropoliteni uchun 5 ta poyezd tarkibini jo‘natgan edi. 20 ta vagondan iborat yangi poyezdlar Toshkent metrosining Yunusobod va Sergeli yo‘nalishlarida harakatlanadi. Mazkur 20 ta vagonning xaridi “O‘zbekiston temir yo‘llari” va “Metrovagonmash” o‘rtasida o‘tkazilgan muzokaralar natijasida amalga oshirildi. Qiymati 27,7 million yevro bo‘lgan shartnomaning 22,14 million yevrosi Rossiyaning Taraqqiyot va tashqi iqtisodiy faoliyat banki krediti hisobiga hamda 5,54 million yevrosi O‘zbekiston tiklanish va taraqqiyot jamg‘armasi hisobiga moliyalashtirilgan.
Izoh (0)