Namangan shahridagi “Oydin plaza” mehmonxonasida shahar hokimi Shavkatjon Abdurazzaqovning yoshlar bilan uchrashuvi bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Uchrashuvga shahardagi o‘quv kurslarida ingliz tili bo‘yicha saboq olayotgan, IELTS imtihonlariga tayyorlanayotgan va bu sinovlardan muvaffaqiyatli o‘tgan yoshlar hamda ularning ustozlari taklif qilindi.
Yoshlar bilan muloqot bunday formatdagi uchrashuvlar uchun ilk bor to‘liqligicha ingliz tilida kechdi.
Hokim yoshlarni shaharda ro‘y berayotgan o‘zgarish va yangiliklardan xabardor qildi. O‘qishlarida muvaffaqiyat tilab, dunyo tili hisoblangan ingliz tilini egallash borasidagi intilishlariga yuksak baho berdi. Bunday uchrashuvlar doimiy tus olgani, kelgusida boshqa yo‘nalishlarga qiziqish bildirgan yoshlar bilan ham muloqotlar o‘tkazilishini ta’kidladi.
Namangan square loyihasi ijrochi direktori Karan Rohan yoshlarni bilimlarini yanada takomillashtirishga hamda xorijning nufuzli oliy o‘quv yurtlarida tahsil olishga chorladi. Kelgusida ushbu kompaniyaning yetakchi xodimlari safini to‘ldirishlariga ishonch bildirdi.
Namangan shahri farzandi, Janubiy Koreyadagi Yonnam universiteti professori Alisher Dedaxanov o‘zi bosib o‘tgan yo‘l haqida qisqacha hikoya qildi. Bugungi kunda yaratilgan imkoniyatlardan to‘laqonli foydalanish lozimligi, yangilanayotgan mamlakat uchun iqtidorli va salohiyatli yoshlar juda kerak ekanligini bildirdi.
Uchrashuvda IELTS imtihonlariga tayyorlanayotgan 10 nafar yoshning har biriga 1,6 million so‘mdan, o‘quv markazlarida tahsil olayotgan 10 nafar yigit-qizga esa 600 ming so‘mdan pul mukofotlari topshirildi.
IELTS sinovlaridan yuqori ballar bilan o‘tgan 5 nafar yoshga kompyuter jamlanmasi sovg‘a qilindi. Shuningdek, har bir ishtirokchiga ingliz tili lug‘ati taqdim qilindi.
Yoshlar bilan muloqot bir piyola choy ustidagi samimiy suhbat va san’atkorlarning chiqishlari bilan davom etdi.
Izoh (0)