Olmaliqda 2 nafar o‘smir olib qochgan Damas ularni quvgan YPX avtomobiliga urildi

Toshkent viloyati Olmaliq shahrida ikki nafar o‘smir Damas avtomobilini olib qochdi. Ularni yo‘l-patrul xizmati xodimlari tomonidan ta’qib qilinayotgan vaqtda boshqaruvni eplay olmay YPX mashinasiga urilgan va ariqqa tushib ketgan. Bu haqda O‘zbekiston IIV huzuridagi Tergov dapartamenti xabar berdi.

Ma’lum qilinishicha, 2020-yil 6-fevral kuni soat 10:00 dan 17:00 gacha bo‘lgan vaqt oralig‘ida noma’lum shaxs 31 yoshli S.X.ga tegishli Damas avtomashinasini Olmaliq shahar Oltin zamin ko‘chasidagi uylarning yonidan olib qochib ketgan.

Mazkur holat yuzasidan Olmaliq shahar IIB huzuridagi Tergov bo‘limi tomonidan O‘zbekiston Respublikasi Jinoyat kodeksining 267-moddasi 1-qismi (transport vositasini olib qochish) bilan jinoyat ishi qo‘zg‘atilgan.

Olib borilgan tergov-tezkor harakatlari natijasida mazkur jinoyatni voyaga yetmagan 16 yoshli B.G. va 17 yoshli Yo.T. sodir etganligi aniqlangan. Olib qochilgan avtomashina o‘smirlar tomonidan Ohangaron tumani hududida boshqarib ketilayotganida, YPX xodimining to‘xtash ishorasiga rioya qilmasdan harakatni davom ettirgan. Haydovchining malakasi yetarli bo‘lmaganligi sababli, Damas YPX avtomashinasi bilan to‘qnashib ketib, yo‘lining chetidagi ariqqa tushib ketishi natijasida to‘xtagan.

Jinoyat ishi bo‘yicha B.G. va Yo.T. protsessual tartibda ushlangan. Dastlabki tergov harakatlari davom etmoqda.