Navoiy viloyati Favqulodda vaziyatlar boshqarmasi tomonidan Navoiy shahrida joylashgan ko‘p qavatli “Yangi hayot” savdo markazida maxsus-taktik o‘quv mashqi o‘tkazildi. Bu haqda boshqarma matubot xizmati “Daryo”ga ma’lum qildi.
Eslatib o‘tamiz, joriy yilning 16-yanvar kuni “Navoiy savdo kompleksi”da yong‘in kelib chiqqandi. Yong‘in natijasida 6 ta savdo do‘konining jami 82 kvadrat metr qismi yonib zararlangan, savdo markazi ichidan hech narsani olib chiqishning imkoni bo‘lmagani xabar qilingandi.
O‘tkazilgan maxsus-taktik o‘quv mashqining asosiy maqsadi savdo markazining tegishli rejalariga amalda aniqlik kiritish, obyekt rahbar tarkibi va fuqaro muhofazasi tuzilmalari shaxsiy tarkibining tadbirlarni bajarishdagi tajriba va malakasini oshirish, shuningdek, obyekt fuqaro muhofazasi tuzilmalarining shahar doimiy tayyorgarlikdagi xizmatlari bilan hamkorlikdagi harakatlarini muvofiqlashtirish etib belgilandi.
O‘quv mashqi “Yig‘in” va saf ko‘rigi, favqulodda vaziyat sodir bo‘lgan hududda qidiruv-qutqaruv ishlarini tashkil qilish, jabrlanuvchilarni xavfsiz hududga evakutsiya qilish va ularga birinchi tibbiy yordam ko‘rsatish, yuzaga kelgan shartli yong‘inni bartaraf qilish kabi bosqichlarda o‘tkazildi.
O‘quv mashqi rejasiga asosan bosqichlar real sharoitlarga yaqinlashtirilgan holda o‘tkazildi.
O‘quv mashqlariga viloyat FVB, Milliy gvardiya, IIB, SSB, “O‘zbektelekom” AK Navoiy filiali, “Navoiy HETK” AJ, “Hududgaz Navoiy” MChJ va obyekt fuqaro muhofaza qilish tuzilmalaridan 12 ta maxsus texnika va 103 nafar xodimlar jalb etildi.
Izoh (0)