Tojikiston Bosh prokuraturasi Suriya shimolidagi qamoqxonada saqlanayotgan Parviz Saidrahmonovni mamlakatga ekstraditsiya qiladi. Tojik maxsus xizmatlari Saidrahmonovni Tojikistonga deportatsiya qilish bo‘yicha barcha kerakli hujjatlarni rasmiylashtirmoqda, deb xabar beradi “Uz.Utro.News”.
Abu Dovud Tojikiy nomi bilan tanilgan Parviz Saidrahmonov IShID olamida xalifalik tarafdolari uchun ko‘plab targ‘ibot roliklarini tayyorlab kelgan. U o‘z videolarida Markaziy Osiyo fuqarolarini IShIDga qo‘shilib, Iroq va Suriyadagi kofirlarga qarshi jihodga chorlagan.
Parviz Saidrahmonovning o‘zi ham o‘nlab harbiy operatsiyalarda ishtirok etgan.
Shvetsiya huquq-tartibot organlari asli samarqandlik bo‘lgan Rahmat Oqilovning terrorchilik harakatini amalga oshirishiga aynan Saidrahmonov aloqadar deb hisoblaydi.
Maxsus xizmatlarning fikricha, Parviz Saidrahmonov Rahmat Oqilovga 2017-yilning aprelida Stokgolmda amalga oshirilgan terakt bo‘yicha o‘z maslahatlarini bergan.
Parviz Saidrahmonovdan tashqari IShID jangarilari safida kurashgan yana bir necha Tojikiston fuqarolari ham ekstraditsiya qilinadi. Ma’lumotlarga ko‘ra, ularning barchasi IShIDning “urush vaziri”ga aylangan Tojikistonning “Omon” maxsus xizmati sobiq polkovnigi Gulmurod Xalimovning yaqinidagi kishilar.
Eslatib o‘tamiz, 2017-yil 7-aprel kuni asli o‘zbekistonlik Rahmat Oqilov olib qochgan yuk mashinasini Stokgolm markazidagi Drottninggatan piyodalar ko‘chasi bo‘ylab haydab, ko‘plab odamlarni bosib ketgan edi.
Terakt deb baholangan hodisa oqibatida besh kishi halok bo‘lgan, o‘n kishi jarohatlangan edi. Oqilov birinchi sud so‘rog‘idayoq bu ishni IShID terrorchilik tashkilotini qo‘llab-quvvatlash maqsadida qilganini tan olgan edi.
Rahmat Oqilov mazkur qilmishi uchun Shvetsiya sudi tomonidan 2018-yil iyunida umrbod ozodlikdan mahrum etilgan edi. U jazoni Shvetsiyaning eng qattiq tartibli qamoqxonasida o‘tamoqda.
Izoh (0)