Тожикистон Бош прокуратураси Сурия шимолидаги қамоқхонада сақланаётган Парвиз Саидраҳмоновни мамлакатга экстрадиция қилади. Тожик махсус хизматлари Саидраҳмоновни Тожикистонга депортация қилиш бўйича барча керакли ҳужжатларни расмийлаштирмоқда, деб хабар беради «Uz.Utro.News».
Абу Довуд Тожикий номи билан танилган Парвиз Саидраҳмонов ИШИД оламида халифалик тарафдолари учун кўплаб тарғибот роликларини тайёрлаб келган. У ўз видеоларида Марказий Осиё фуқароларини ИШИДга қўшилиб, Ироқ ва Суриядаги кофирларга қарши жиҳодга чорлаган.
Парвиз Саидраҳмоновнинг ўзи ҳам ўнлаб ҳарбий операцияларда иштирок этган.
Швеция ҳуқуқ-тартибот органлари асли самарқандлик бўлган Раҳмат Оқиловнинг террорчилик ҳаракатини амалга оширишига айнан Саидраҳмонов алоқадар деб ҳисоблайди.
Махсус хизматларнинг фикрича, Парвиз Саидраҳмонов Раҳмат Оқиловга 2017 йилнинг апрелида Стокгольмда амалга оширилган теракт бўйича ўз маслаҳатларини берган.
Парвиз Саидраҳмоновдан ташқари ИШИД жангарилари сафида курашган яна бир неча Тожикистон фуқаролари ҳам экстрадиция қилинади. Маълумотларга кўра, уларнинг барчаси ИШИДнинг «уруш вазири»га айланган Тожикистоннинг «Омон» махсус хизмати собиқ полковниги Гулмурод Халимовнинг яқинидаги кишилар.
Эслатиб ўтамиз, 2017 йил 7 апрель куни асли ўзбекистонлик Раҳмат Оқилов олиб қочган юк машинасини Стокгольм марказидаги Дроттнинггатан пиёдалар кўчаси бўйлаб ҳайдаб, кўплаб одамларни босиб кетган эди.
Теракт деб баҳоланган ҳодиса оқибатида беш киши ҳалок бўлган, ўн киши жароҳатланган эди. Оқилов биринчи суд сўроғидаёқ бу ишни ИШИД террорчилик ташкилотини қўллаб-қувватлаш мақсадида қилганини тан олган эди.
Раҳмат Оқилов мазкур қилмиши учун Швеция суди томонидан 2018 йил июнида умрбод озодликдан маҳрум этилган эди. У жазони Швециянинг энг қаттиқ тартибли қамоқхонасида ўтамоқда.
Изоҳ (0)