O‘zbekiston Tashqi ishlar vaziri Abdulaziz Komilov 28-yanvar kuni Berlindagi xalqaro konferensiya doirasida Qozog‘iston Tashqi ishlar vaziri Muxtor Tleuberdi bilan uchrashdi. Bu haqda vazirlik matbuot xizmati xabar bermoqda.
Uchrashuvda 2019-yilning 29-noyabrida Toshkentda tashkil etilgan Markaziy Osiyo davlatlari rahbarlarining ikkinchi maslahat uchrashuvi yakunlari yuqori baholanib, sammitda qabul qilingan mintaqaviy integratsiyani chuqurlashtirishga qaratilgan qarorlarni amaliyotga tatbiq etish masalalari muhokama qilindi.
“Tomonlar O‘zbekiston va Qozog‘iston o‘rtasidagi yaxshi qo‘shnichilik va do‘stona munosabatlarni yanada mustahkamlashdan manfaatdor ekanligi, O‘zbekiston Respublikasi Prezidenti Shavkat Mirziyoyevning Qozog‘istonga rejalashtirilgan tashrifi buning muhim bosqich bo‘lishini ta’kidladi”, — deyiladi O‘zbekiston TIV xabarida.
Har ikki mamlakat tashqi ishlar vazirlari 3-fevral kuni Toshkentda AQSh davlat kotibi Maykl Pompeo ishtirokida Markaziy Osiyo va AQSh tashqi ishlar vazirlarining “5+1” formatidagi uchrashuvini o‘tkazish, shuningdek, ikki tomonlama va xalqaro munosabatlarning boshqa muhim masalalarini ham muhokama qilgan.
Izoh (0)