MIBning Toshkent viloyati boshqarmasi Ahmadjon Tursunboyev jinoiy ishi bo‘yicha 12 mingga yaqin fuqaroga yetkazilgan zararni qaytarishni boshladi. Bu haqda 28-yanvar kuni MIBning Toshkent viloyati boshqarmasida jurnalistlar bilan bo‘lib o‘tgan ochiq muloqotda ma’lum qilindi, deya xabar bermoqda “Daryo” muxbiri Musulmonbek Ibrohimov.
Eslatib o‘tamiz, 2019-yil 28-oktabr kuni jinoyat ishlari bo‘yicha Quyi Chirchiq tuman sudi O‘zbekiston tarixidagi eng mashhur moliyaviy piramidani qurgan chinozlik Ahmadboy (Ahmadjon Tursunboyev) va uning jinoiy sheriklariga (sudlanuvchilarning umumiy soni — 16) nisbatan jinoyat ishining tergov bilan yakunlangan qismini ko‘rib chiqish bo‘yicha uchinchi sud hukmini e’lon qilgandi. Ahmadjon Tursunboyevga Jinoyat kodeksining 59-moddasi 8-qismi va 61-moddalari tartibida tayinlangan jazoga qisman jinoyat ishlari bo‘yicha Toshkent viloyat sudining 2019-yil 20-maydagi hukmi bilan tayinlangan jazosini qo‘shib, uzil-kesil o‘tash uchun 1 yil muddatga tadbirkorlik bilan shug‘ullanish huquqidan mahrum qilgan holda 14 yil 3 oy ozodlikdan mahrum qilish hamda eng kam oylik ish haqining 400 baravari miqdorida 52 million 96 ming so‘m jarima jazolari tayinlangan edi.
Jinoyat ishlari bo‘yicha Toshkent viloyati sudining 2019-yil 20-may kungi hukmiga ko‘ra, Ahmadjon Tursunboyev va boshqalarga oid jinoyat ishi yuzasidan dastlabki tergov davrida xatlangan va olingan chet el va milliy valyutadagi pul mablag‘lari, bino-inshootlar, avtotransport vositalari va zargarlik buyumlarini sotuvga qo‘yish belgilangan. Sotuvdan tushgan pul mablag‘larini 11 700 nafar jabrlanuvchilar foydasiga jami 418 milliard 293 million so‘m yetkazilgan zararni qoplash va proporsional tarzda taqsimlash to‘g‘risidagi ijro hujjatlari byuroning Toshkent viloyati boshqarmasi ish yurituviga yuborilgan.
Tursunboyevning jinoyat ishi bo‘yicha 126 milliard 708 million so‘m, 12 million 580 ming dollar, zargarlik buyumlari hamda 29 dona ko‘chmas mulk obyektlari, 8 turdagi avtotransport vositalari va boshqa mol-mulklar pul mablag‘lari yetkazilgan zarar miqdorini qoplash uchun xatlangan.
Mazkur mol-mulklar sud qaroriga asosan sotuvga qo‘yilib, sotuvdan tushgan pul mablag‘larini jabrlanuvchilarga yetkazilgan zararni qoplash uchun proporsional tarzda taqsimlash belgilangan. Tergov davomida xatlangan hamda mol-mulk sotuvidan 146 milliard so‘m tushgan.
Byuroning Toshkent viloyati boshqarmasi tomonidan elektron dastur ishlab chiqilib va ularga undirilishi lozim bo‘lgan mablag‘lar haqida ma’lumot jolashtirildi.
Undirilgan pul mablag‘lari 11 700 nafar jabrlanuvchiga “Sud hujjatlari va boshqa organlar hujjatlarini ijro etish to‘g‘risida”gi qonunning 80-moddasi talablari asosida barcha undiruvchilarga avtomatik tarzda mutanosib (proporsional) ravishda maxsus dastur orqali taqsimlanadi. Ya’ni qancha pul berganiga qarab taqsimot bo‘ladi. Masalan, umumiy taqsimot 30 foiz bo‘lsa, kim 100 million so‘m bergan bo‘lsa, 30 million; kim 10 million bergan bo‘lsa, 3 million so‘m beriladi.
Hozirda dastur orqali taqsimlangan pul mablag‘larini jabrlanuvchilarning plastik kartalariga o‘tkazib berish ishlari boshlanib, qisqa muddatda qolgan undiruvchilarga ham mablag‘ tushirib beriladi.
Izoh (0)