O‘zbekiston Respublikasi Markaziy banki sharhiga ko‘ra, 2019-yil davomida O‘zbekiston davlat budjeti xarajatlari 2018-yilga nisbatan 37 foizga ko‘paygan.
Qayd etilishicha, qo‘shimcha xarajatlar ijtimoiy va infratuzilma obyektlarini qurish va rekonstruksiya qilishga qaratilgan davlat dasturlarini amalga oshirish bo‘yicha yuzaga kelgan.
Moliya vazirligi 2019-yil davlat budjetining daromadlarini 2018-yilga nisbatan 38 foizga o‘sib, 102,6 trillion so‘mga, xarajatlari esa 107,1 trillion so‘mga yetishini prognoz qilgan edi.
Sharhda qayd etilishicha, iqtisodiy o‘sishning asosiy omili soliq-budjet siyosatini rag‘batlantirish va xususiy sektor subyektlarini maqsadli kredit bilan qo‘llab-quvvatlash natijasida iqtisodiyotdagi investitsiyalar va iste’mol faolligining o‘sishi bo‘lgan.O‘tgan yilda asosiy kapitaldagi investitsiyalarning o‘sish sur’ati 33,9 foizni tashkil etgan, ularning yalpi ichki mahsulotdagi ulushi esa 37,1 foizgacha o‘sgan.
Investitsion xarajatlarning o‘sishi, asosan, tadbirkorlik faoliyatini rivojlantirish bo‘yicha davlat dasturlarini amalga oshirish, iqtisodiyotning asosiy tarmoqlarida ishlab chiqarish quvvatlarini yangilash va tarkibiy islohotlarni, shu jumladan, qishloq xo‘jaligini moliyalashtirish bilan bog‘liq.
Ta’kidlanishicha, iste’molchilar talabining oshishi ko‘pgina sohalardagi ish haqining sezilarli darajada o‘sishi (davlat sektorida 39 foizga o‘sishi), aholi real daromadlarining ko‘payishi (2018-yilga nisbatan 7 foiz) va xorijdan pul o‘tkazmalarining oshishi bilan bog‘liq bo‘lgan.
Izoh (0)