Ўзбекистон Ташқи ишлар вазири Абдулазиз Комилов 28 январь куни Берлиндаги халқаро конференция доирасида Қозоғистон Ташқи ишлар вазири Мухтор Тлеуберди билан учрашди. Бу ҳақда вазирлик матбуот хизмати хабар бермоқда.
Учрашувда 2019 йилнинг 29 ноябрида Тошкентда ташкил этилган Марказий Осиё давлатлари раҳбарларининг иккинчи маслаҳат учрашуви якунлари юқори баҳоланиб, саммитда қабул қилинган минтақавий интеграцияни чуқурлаштиришга қаратилган қарорларни амалиётга татбиқ этиш масалалари муҳокама қилинди.
«Томонлар Ўзбекистон ва Қозоғистон ўртасидаги яхши қўшничилик ва дўстона муносабатларни янада мустаҳкамлашдан манфаатдор эканлиги, Ўзбекистон Республикаси Президенти Шавкат Мирзиёевнинг Қозоғистонга режалаштирилган ташрифи бунинг муҳим босқич бўлишини таъкидлади», — дейилади Ўзбекистон ТИВ хабарида.
Ҳар икки мамлакат ташқи ишлар вазирлари 3 февраль куни Тошкентда АҚШ давлат котиби Майкл Помпео иштирокида Марказий Осиё ва АҚШ ташқи ишлар вазирларининг «5+1» форматидаги учрашувини ўтказиш, шунингдек, икки томонлама ва халқаро муносабатларнинг бошқа муҳим масалаларини ҳам муҳокама қилган.
Изоҳ (0)