Amerikalik harbiylar Afg‘onistonda falokatga uchragan Bombardier E-11A harbiy samolyoti halokatga uchragan joydan ikki kishining jasadini topdi. Bu haqda AQShning mintaqadagi guruhi vakili Sonni Leggett o‘zining Twitter’dagi sahifasi orqali ma’lum qilgan.
Ma’lum qilinishicha, falokat joyiga yetib kelgan mahalliy aholi halok bo‘lgan amerikalik harbiylarning jasadiga nisbatan “hurmatda bo‘lgan”.
Shuningdek, amerikaliklar falokatga uchragan samolyotning qora qutisini ham topishga muvaffaq bo‘lgan. Amerika qo‘mondonligining ma’lum qilishicha, falokat sabablarini aniqlash bo‘yicha surishtiruv o‘tkazilmoqda, biroq “samolyot dushman hujumidan urib tushirilganini isbotlovchi biror-bir dalil yo‘q”.
Rasmiy ma’lumotlarga ko‘ra, falokatga uchragan E-11A samolyoti bortida ikki kishigina bo‘lgan.
“Tolibon” harakati esa samolyotni o‘zlari urib tushirganliklarini ma’lum qilgan. Harakat yetakchisi Zabihullo Mujohidning aytishicha, jangarilar falokat sodir bo‘lgan G‘azna viloyatidagi hududga afg‘on armiyasining borishiga yo‘l qo‘ymagan, biroq qutqaruv jamoasining samolyot qoldiqlariga qadar yetib borishi va murdalarni olib ketishiga ruxsat bergan. “Tolibon” bayonotida ta’kidlanishicha, samolyotda amerikalik harbiylar, xususan, yuqori martabali zobitlar bo‘lgan.
Izoh (0)