Prezident Shavkat Mirziyoyev 28-yanvar, seshanba kuni turizmni rivojlantirish, jismoniy tarbiya va sportni yanada ommalashtirish masalalari bo‘yicha yig‘ilish o‘tkazdi.
2019-yili O‘zbekistonga 6,7 million nafar sayyoh kelgan. Mamlakat 10 dan ortiq nufuzli xalqaro nashrlarda eng jozibali turistik maskan sifatida e’tirof etildi. 2020-yilda xorijdan keladigan sayyohlar sonini 7,5 millionga, 2022-yilda 10 millionga va 2025-yilda 12 millionga yetkazish rejalashtirilgan.
“Bu orqali turizm xizmatlari eksporti joriy yilda 1,5 milliard dollar, keyingi 5 yilda 3 milliard dollargacha oshiriladi”, — deyiladi Prezident matbuot xizmati axborotida. Yig‘ilishda ayni vaqtda jahon standartlariga mos mehmonxonalar, malakali gidlar yetishmasligi ta’kidlangan.
Shu bois mehmonxonalarni 2020-yilda 1 700 taga, kelgusi 5 yilda 3 mingtagacha ko‘paytirish, oilaviy mehmon uylarini ham 2 mingtaga yetkazish maqsad qilingan. Bular orqali turizm sohasida yiliga kamida 30 mingta yangi ish o‘rni yaratish ko‘zda tutilgan.
Tanqidiy tahlil ruhida o‘tgan yig‘ilishda ushbu natijalarga erishish uchun amalga oshirilishi zarur bo‘lgan chora-tadbirlar muhokama qilingan. Sayyohlikning an’anaviy turlari qamrovini kengaytirish bilan birga yangi ko‘rinishlarini ko‘paytirish zarurligi ta’kidlangan.
Xususan, kardiologiya, urologiya, stomatologiya, oftalmologiya kabi O‘zbekiston yuqori salohiyatga ega bo‘lgan tibbiyot yo‘nalishlarida turizmni rivojlantirish, sog‘lomlashtirish va dam olish maskanlariga investorlarni jalb qilish bo‘yicha topshiriqlar berilgan. MDH davlatlari kasaba uyushmalari bilan yaqin aloqalarni yo‘lga qo‘yib, sayyohlar sonini keskin oshirish mumkinligi ko‘rsatib o‘tilgan.
Turizmni rivojlantirish davlat qo‘mitasi va Madaniyat vazirligiga turizm marshrutiga kiritilgan obyektlar sonini 2020-yilda 800 taga, 2025-yilda esa 2,5 mingtaga yetkazish vazifasi qo‘yilgan. Qishki turizmni rivojlantirish bo‘yicha 2020—2025-yillarga mo‘ljallangan investitsiya loyihalarini ishlab chiqib, amalga oshirish muhimligi ta’kidlangan.
Shuningdek, yo‘lbo‘yi turizm infratuzilmasini rivojlantirish, “turizm qishlog‘i”, “turizm ovuli” va “turizm mahallasi” loyihalarini amalga oshirish masalalariga ham to‘xtalib o‘tilgan.
Turizm sohasida kadrlar masalasiga e’tibor qaratilar ekan, 20 ta oliy ta’lim muassasasida hamda Turizmni rivojlantirish davlat qo‘mitasiga biriktirilgan 3 ta texnikum va 9 ta kollejda ishchi kasblar tayyorlash tizimini joriy etish bo‘yicha hali ko‘p muammolar o‘z yechimini topmagani ko‘rsatib o‘tildi. O‘quv jarayonida ilg‘or tajribalarni joriy etish bo‘yicha vazifalar belgilandi.
Izoh (0)