Президент Шавкат Мирзиёев 28 январь, сешанба куни туризмни ривожлантириш, жисмоний тарбия ва спортни янада оммалаштириш масалалари бўйича йиғилиш ўтказди.
2019 йили Ўзбекистонга 6,7 миллион нафар сайёҳ келган. Мамлакат 10 дан ортиқ нуфузли халқаро нашрларда энг жозибали туристик маскан сифатида эътироф этилди. 2020 йилда хориждан келадиган сайёҳлар сонини 7,5 миллионга, 2022 йилда 10 миллионга ва 2025 йилда 12 миллионга етказиш режалаштирилган.
«Бу орқали туризм хизматлари экспорти жорий йилда 1,5 миллиард доллар, кейинги 5 йилда 3 миллиард долларгача оширилади», — дейилади Президент матбуот хизмати ахборотида. Йиғилишда айни вақтда жаҳон стандартларига мос меҳмонхоналар, малакали гидлар етишмаслиги таъкидланган.
Шу боис меҳмонхоналарни 2020 йилда 1 700 тага, келгуси 5 йилда 3 мингтагача кўпайтириш, оилавий меҳмон уйларини ҳам 2 мингтага етказиш мақсад қилинган. Булар орқали туризм соҳасида йилига камида 30 мингта янги иш ўрни яратиш кўзда тутилган.
Танқидий таҳлил руҳида ўтган йиғилишда ушбу натижаларга эришиш учун амалга оширилиши зарур бўлган чора-тадбирлар муҳокама қилинган. Сайёҳликнинг анъанавий турлари қамровини кенгайтириш билан бирга янги кўринишларини кўпайтириш зарурлиги таъкидланган.
Хусусан, кардиология, урология, стоматология, офталмология каби Ўзбекистон юқори салоҳиятга эга бўлган тиббиёт йўналишларида туризмни ривожлантириш, соғломлаштириш ва дам олиш масканларига инвесторларни жалб қилиш бўйича топшириқлар берилган. МДҲ давлатлари касаба уюшмалари билан яқин алоқаларни йўлга қўйиб, сайёҳлар сонини кескин ошириш мумкинлиги кўрсатиб ўтилган.
Туризмни ривожлантириш давлат қўмитаси ва Маданият вазирлигига туризм маршрутига киритилган объектлар сонини 2020 йилда 800 тага, 2025 йилда эса 2,5 мингтага етказиш вазифаси қўйилган. Қишки туризмни ривожлантириш бўйича 2020—2025 йилларга мўлжалланган инвестиция лойиҳаларини ишлаб чиқиб, амалга ошириш муҳимлиги таъкидланган.
Шунингдек, йўлбўйи туризм инфратузилмасини ривожлантириш, «туризм қишлоғи», «туризм овули» ва «туризм маҳалласи» лойиҳаларини амалга ошириш масалаларига ҳам тўхталиб ўтилган.
Туризм соҳасида кадрлар масаласига эътибор қаратилар экан, 20 та олий таълим муассасасида ҳамда Туризмни ривожлантириш давлат қўмитасига бириктирилган 3 та техникум ва 9 та коллежда ишчи касблар тайёрлаш тизимини жорий этиш бўйича ҳали кўп муаммолар ўз ечимини топмагани кўрсатиб ўтилди. Ўқув жараёнида илғор тажрибаларни жорий этиш бўйича вазифалар белгиланди.
Изоҳ (0)