Navoiy shahridagi 4 qavatli savdo majmuasida 16-yanvar kuni kechqurun kuchli yong‘in yuz berganligi haqida xabar berilgan edi.
Navoiy viloyati hokimligi tomonidan ma’lum qilinishicha, 16-yanvar kuni soat taxminan 21:19 da Navoiy shahridagi 3 qavatli (yerto‘la qismi bilan 4 qavat) “Navoiy savdo kompleksi”ning eng yuqori qavatida yong‘in kelib chiqqan. Natijada 6 ta kiyim-kechak savdo do‘konining 82 metr kvadrat qismi yonib, yaroqsiz holga kelgan, 14 ta savdo do‘koni esa zararlangan.
Navoiy viloyati Favqulodda vaziyatlar boshqarmasi tomonidan ma’lum qilinishicha, boshqarma navbatchilik qismiga kelib tushgan ma’lumotga asosan soat 21:23 da voqea joyiga 7 ta yong‘in o‘chirish va 1 ta qutqaruv avtomashinasi yetib borgan. Amalga oshirilgan tezkor tadbirlar natijasida soat 21:45 da yong‘in to‘liq bartaraf etilgan hamda majmuaning 208 ta savdo do‘koni joylashgan 6958 metr kvadrat qismi yong‘indan saqlab qolingan. Hodisa oqibatida halok bo‘lganlar va tan jarohati olganlar yo‘q. Dastlabki taxminlarga ko‘ra yong‘in qisqa tutashuv natijasida kelib chiqqan.
Viloyat hokimligi xabariga ko‘ra mazkur holat yuzasidan Navoiy shahar hokimligi tomonidan bir qator ishlar olib borilmoqda. Xususan, shahar hokimi Muhiddin Bozorov 17-yanvar kuni ertalab tegishli rahbarlar bilan birgalikda hodisa joyini ko‘zdan kechirib, zarar ko‘rgan do‘kon egalari bilan suhbatlashgan. Shuningdek, tadbirkorlarga yonib ketgan do‘konlarni ta’mirlash bozor ma’muriyati tomonidan amalga oshirilishi va ularga faoliyatlarini tiklagunga qadar zarur barcha yordamlar berilishi ma’lum qilindi.
Ayni paytda shahar hokimligida ushbu masala yuzasidan alohida ishchi guruh tuzilib, tadbirkorlarga ko‘mak berish bo‘yicha tegishli ishlar amalga oshirilmoqda, deyiladi hokimlik xabarida.
Avvalroq, mazkur yong‘in yuzasidan O‘zbekiston Ichki ishlar vazirligi huzuridagi Tergov departamenti rasmiy ma’lumot bergan edi.
Izoh (0)