Toshkent davlat yuridik universiteti 2020/2021-o‘quv yilidan boshlab bir qancha yangi yo‘nalishlar bo‘yicha abituriyentlar qabul qilishni rejalashtirmoqda. Bu haqda 16-yanvar kuni AOKAda o‘tkazilgan matbuot anjumanida Adliya vaziri o‘rinbosari, Toshkent davlat yuridik universiteti rektori Rahimjon Hakimov ma’lum qildi.
“O‘zini o‘zi moliyalashtirish tizimiga o‘tganimizdan so‘ng vasiylik kengashi bilan birgalikda bugungi zamon talablaridan kelib chiqib yangi yo‘nalishlar bo‘yicha bakalavr va magistratura bosqichlarini ochish bo‘yicha muzokaralar olib boryapmiz. Oddiy misol, hozir bizda magistraturada advokatura yo‘nalishi yo‘q. Lekin advokatlar palatasidan advokatura yo‘nalishi ochish yuzasidan juda katta talab kelib tushyapti. Advokaturani chuqurroq o‘rgatish, bu sohada ilmiy tadqiqotlarni kuchaytirish maqsadida yangi o‘quv yilidan alohida advokatura yo‘nalishini ochamiz. Bundan tashqari, yurtimizda xalqaro arbitraj sohasi mutaxassislariga ham talab katta. Bu yo‘nalish bo‘yicha ham chet el professor-o‘qituvchilarini jalb qilgan holda magistrlarni tayyorlashni ko‘zda tutmoqdamiz. Bularning barchasi amaliyot talablaridan kelib chiqadi. O‘zini o‘zi moliyalashtirishga o‘tish real hayotga, bozor talablariga moslashtirishga olib keladi”, — dedi Hakimov.
Matbuot anjumanidan so‘ng “Daryo” muxbiri Mirolim Isajonovga qisqa intervyu bergan Toshkent davlat yuridik universiteti rektori bakalavr bosqichida ham yangi yo‘nalish ochish ko‘zda tutilayotganini qayd etdi.
“Biz xalqaro reytinglarga chiqishni oldimizga maqsad qilganmiz. Bu 2030-yilgacha oliy ta’limni rivojlantirish konsepsiyasida ham belgilangan. Buning uchun ta’lim yo‘nalishlari ko‘p bo‘lishi kerak. Toshkent davlat yuridik universitetida faqat huquqshunoslarni tayyorlaymiz. Bitta yo‘nalish bilan xalqaro reytingga chiqish juda qiyin. Shuning uchun bir qancha yangi ta’lim yo‘nalishlari ochishni rejalashtiryapmiz. Hozir O‘zbekistonda davlat boshqaruvi yo‘nalishi bo‘yicha bakalavr mutaxassislari tayyorlaydigan oliy ta’lim muassasasi yo‘q. Bu chet davlatlarda juda rivojlangan. Biz mana shu yo‘nalishda bakalavr bosqichini ochishni niyat qilganmiz. Ayni paytda bu borada o‘rganish ishlarini olib bormoqdamiz. Buning uchun zarur kadrlar zaxirasini shakllantirib, tegishli darsliklar tayyorlay olsak, albatta, yangi o‘quv yilidan davlat boshqaruvi yo‘nalishini ochmoqchimiz”, — dedi Rahimjon Hakimov.
Izoh (0)