Навоий шаҳридаги 4 қаватли савдо мажмуасида 16 январь куни кечқурун кучли ёнғин юз берганлиги ҳақида хабар берилган эди.
Навоий вилояти ҳокимлиги томонидан маълум қилинишича, 16 январь куни соат тахминан 21:19 да Навоий шаҳридаги 3 қаватли (ертўла қисми билан 4 қават) «Навоий савдо комплекси»нинг энг юқори қаватида ёнғин келиб чиққан. Натижада 6 та кийим-кечак савдо дўконининг 82 метр квадрат қисми ёниб, яроқсиз ҳолга келган, 14 та савдо дўкони эса зарарланган.
Навоий вилояти Фавқулодда вазиятлар бошқармаси томонидан маълум қилинишича, бошқарма навбатчилик қисмига келиб тушган маълумотга асосан соат 21:23 да воқеа жойига 7 та ёнғин ўчириш ва 1 та қутқарув автомашинаси етиб борган. Амалга оширилган тезкор тадбирлар натижасида соат 21:45 да ёнғин тўлиқ бартараф этилган ҳамда мажмуанинг 208 та савдо дўкони жойлашган 6958 метр квадрат қисми ёнғиндан сақлаб қолинган. Ҳодиса оқибатида ҳалок бўлганлар ва тан жароҳати олганлар йўқ. Дастлабки тахминларга кўра ёнғин қисқа туташув натижасида келиб чиққан.
Вилоят ҳокимлиги хабарига кўра мазкур ҳолат юзасидан Навоий шаҳар ҳокимлиги томонидан бир қатор ишлар олиб борилмоқда. Хусусан, шаҳар ҳокими Муҳиддин Бозоров 17 январь куни эрталаб тегишли раҳбарлар билан биргаликда ҳодиса жойини кўздан кечириб, зарар кўрган дўкон эгалари билан суҳбатлашган. Шунингдек, тадбиркорларга ёниб кетган дўконларни таъмирлаш бозор маъмурияти томонидан амалга оширилиши ва уларга фаолиятларини тиклагунга қадар зарур барча ёрдамлар берилиши маълум қилинди.
Айни пайтда шаҳар ҳокимлигида ушбу масала юзасидан алоҳида ишчи гуруҳ тузилиб, тадбиркорларга кўмак бериш бўйича тегишли ишлар амалга оширилмоқда, дейилади ҳокимлик хабарида.
Аввалроқ, мазкур ёнғин юзасидан Ўзбекистон Ички ишлар вазирлиги ҳузуридаги Тергов департаменти расмий маълумот берган эди.
Изоҳ (0)