Jizzax viloyat ichki ishlar boshqarmasi transportda jamoat xavfsizligini ta’minlash bo‘limi xodimlari tomonidan poyezdlar harakatlanadigan hududlarda chorva mollarini boqmaslik va vagonlarga tosh otmaslik yuzasidan tushuntirishlar olib borilmoqda. Bu haqda Jizzax viloyati Ichki ishlar boshqarmasi axborot xizmati “Daryo”ga ma’lum qildi.
Xabarda aytilishicha, IIV Transportda xavfsizlikni ta’minlash bosh boshqarmasi mas’ullari Jizzax viloyatida profilaktik tadbirlarni kuchaytirmoqda.
Xususan, temir yo‘llar chekkasiga o‘rnatilgan temir-beton devorlar, metall panjaralarga zarar yetkazmaslik, temir yo‘llarga yondosh hududlarda voyaga yetmaganlarni qarovsiz qoldirmaslik hamda chorva mollar boqmaslik yuzasidan aholiga tushunchalar berilmoqda.
Ta’kidlanishicha, so‘nggi yillarda temir yo‘llarda ko‘ngilsiz hodisalar va qoidabuzarliklar soni ortgan. Jumladan, viloyat Ichki ishlar boshqarmasi transportda jamoat xavfsizligini ta’minlash bo‘limi xodimlari tomonidan o‘tgan 2019-yil davomida 831 nafar fuqaroga ma’muriy bayonnoma rasmiylashtirildi.
Izoh (0)