Жиззах вилоят ички ишлар бошқармаси транспортда жамоат хавфсизлигини таъминлаш бўлими ходимлари томонидан поездлар ҳаракатланадиган ҳудудларда чорва молларини боқмаслик ва вагонларга тош отмаслик юзасидан тушунтиришлар олиб борилмоқда. Бу ҳақда Жиззах вилояти Ички ишлар бошқармаси ахборот хизмати «Дарё»га маълум қилди.
Хабарда айтилишича, ИИВ Транспортда хавфсизликни таъминлаш бош бошқармаси масъуллари Жиззах вилоятида профилактик тадбирларни кучайтирмоқда.
Хусусан, темир йўллар чеккасига ўрнатилган темир-бетон деворлар, металл панжараларга зарар етказмаслик, темир йўлларга ёндош ҳудудларда вояга етмаганларни қаровсиз қолдирмаслик ҳамда чорва моллар боқмаслик юзасидан аҳолига тушунчалар берилмоқда.
Таъкидланишича, сўнгги йилларда темир йўлларда кўнгилсиз ҳодисалар ва қоидабузарликлар сони ортган. Жумладан, вилоят Ички ишлар бошқармаси транспортда жамоат хавфсизлигини таъминлаш бўлими ходимлари томонидан ўтган 2019 йил давомида 831 нафар фуқарога маъмурий баённома расмийлаштирилди.
Изоҳ (0)