Qashqadaryolik tadbirkor prokurorni restoraniga bostirib kirib, kompyuterini tepib sindirishda va mijozlarini jinoyatchidek qo‘lini orqaga qayirib, olib chiqib ketishda ayblamoqda.
Bu haqda “Daryo”ga shikoyat qilgan qarshilik tadbirkor O‘tkir Ostonov voqea 2020-yil 11-yanvar kuni tungi soat 22:30 da sodir bo‘lganini aytmoqda.
— Har doimgi ish vaqtimiz Qarshi shahar prokurori Aktam Navro‘zov IIB xodimlaridan iborat 10-15 kishi bilan restoranimizga bostirib kirib, musiqa qo‘yilgan kompyuterimizni tepib sindirdi, o‘yin-kulgi qilayotgan mijozlarimizni esa qo‘lini orqaga qayirib, jinoyatchidek sudrab olib chiqdi, — deydi O‘tkir Ostonov. — Sababini so‘rasam, “bola-chaqang borku, shunday harom yedirasanmi?”, — deya o‘dag‘aylab ketdi. Men esa qaysi ishim xatoligini so‘radim. Javob berishmadi. Xonamga chiqib, kuzatuv kamerasidagi videolar yozilgan xotirani ham olib ketishdi.
Tadbirkorning “Daryo” muxbiriga aytishicha, “3 Palma” deb nomlanuvchi oshxona-restorani asosan kechki payt faoliyat yuritadi. U shu tadbirkorligi bilan 20 nafar kishini ish bilan ta’minlagan. Har oy davlatga 8—10 million so‘m soliq to‘laydi.
— Choyxonamning ish faoliyati sabab 20 nafar kishini ish bilan ta’minlaganman, oyiga 8—10 million so‘m soliq to‘layman, — deydi O‘tkir Ostonov. — Nega bunday muomala qilishdi, tushunolmadim.
Tadbirkorning aytishicha, “tungi reyd”dan bir kun oldin Qarshi shahar IIB boshlig‘ining Elmurod ismli o‘rinbosari uni chaqirib, kechki payt 23:00 dan keyin faoliyat yuritmayman, degan mazmunda tushuntirish xati yozib berishini so‘ragan. Tadbirkor esa bu talabga javoban tadbirkor sifatida 24 soat ham faoliyat yuritishi mumkinligini, tunda ish faoliyatini davom ettirishi uchun barcha talablarni bajarganini aytgan. Va tungi soat 23:00 da musiqani o‘chirishini, ammo ovqatlanish uchun o‘tirgan mijozlarini o‘sha payt chiqarib yuborolmasligini aytgan.
Tadbirkorning aniqlik kiritishicha, tungi restoranlar agar kuzatuv kameralari ishlab tursa, qo‘riqlash xizmati bilan shartnomasi bo‘lsa va biror kelishmovchilik yuz bergan payt qo‘riqlash xodimlari yetib keladigan “trevoga” tugmasi ishlab tursa, u 24 soat faoliyat yuritishi mumkin.
— Bir kun oldin qo‘yilgan talabni bajarmaganim sabab 2020-yil 11-yanvar kuni bostirib kelib, zo‘ravonlik qilishdi, — deydi O‘tkir Ostonov.
Prokurorga qo‘yilayotgan aybni restoran ishchisi Elbek Qurbonov ham tasdiqlab, voqeaga guvoh bo‘lganini aytmoqda.
— Tasodifan 10—15 kishi kirib kelishdi va ichkarini syomka qila boshlashdi, oradan 10 daqiqa o‘tar-o‘tmas fuqaro kiyimidagi bir kishi stol ustida turgan kompyuterni tepib, sindirdi. Va mijozlarning qo‘lini orqaga qayirib, olib chiqib ketdi.
Noutbuk egasi Aziz Jumanazarovning aytishicha, kompyuterini haqiqatdan ham prokuror tepib sindirgan.
— Kompyuterimni sindirishgach, restoran egasiga shikoyat qildim, — deydi Aziz Jumanazarov. — U kishi “sindirgan odamga boring” — dedi. Shu sabab avval prokuraturaning 10-07 qisqa raqamlariga, so‘ngra Ichki ishlar vazirligining 11-02 raqamiga chiqdim va shikoyatimni qoldirdim. 15—20 kunda o‘rganib, natijasini aytamiz deyishdi. Qonunlarimizda mulk daxlsizligi belgilangan-ku, nega prokuror mening mulkimni yaroqsiz holga keltiradi?
Tadbirkor O‘tkir Ostonovning ma’lumot berishicha, mazkur murojaatdan so‘ng Qarshi shahar 2-sonli IIB boshlig‘i Alisher Jo‘rayev tadbirkorni chaqirib, Aziz ismli ishchisini chaqirishini, murojaatni yopish uchun da’voyim yo‘q degan tushuntirish xati yozib berishlarini so‘ragan. Tabiiyki, tadbirkor buni rad etgan.
O‘sha kuni restoran mijozlariga xizmat ko‘rsatgan ishchi Dildora Jamolova ham stol ustidagi noutbuk tepib sindirilganini, ammo tepgan kishini tanimasligini bildirdi.
— Noutbuk tepib sindirildi va baqir-chaqir boshlandi, shunda bizni ham xonadan chiqarib yuborishdi, — deydi Dildora Jamolova. — Noutbukni tepgan kishini tanimayman. Ammo mijozlarning qo‘li qayrilib olib chiqilgani ham bor gap.
Voqea sodir bo‘lgan kuni restoranda mijoz sifatida o‘tirgan Salohiddin Xushmurodov hamda Shohrux Jabborovning aytishicha, noutbukni fuqaro kiyimidagi shaxs tepib sindirgan. Va Shohrux Jabborovni aynan o‘sha shaxs tilga olib bo‘lmaydigan so‘zlar bilan so‘kib, ko‘chaga sudrab olib chiqqan.
— O‘sha kompyuterni tepib sindirgan fuqaro kiyimidagi kishi avvaliga meni haqorat qildi va bo‘ynimdan ushlab, ko‘chaga sudrab olib chiqdi. Milliy gvardiya mashinasida IIBga olib ketishdi. U yerda yarim soat ushlab turishib, so‘ngra qo‘yib yuborishdi. Nega IIBga olib borishdi, bilmayman.
“Daryo”ga shikoyat qilgan tadbirkor IIB xodimlari olib ketgan kuzatuv kamerasi xotirasida barcha voqea yozilganini aytib, xotira haligacha qaytarib berilmaganini bildirdi.
Mazkur holatga izoh olish maqsadida Qashqadaryo viloyati prokuraturasi va Ichki ishlar boshqarmasi axborot xizmatiga bog‘landik.
Viloyat IIB axborot xizmatining aytishicha, kuzatuv kameralarining xotirasi 2019-yil 4-dekabr kuni bo‘lib o‘tgan voqea (aytilishicha, o‘sha kuni mazkur restoranda qasddan badanga og‘ir shikast yetkazish holati kuzatilgan) internet tarmoqlarida tarqalib ketmasligining oldini olish maqsadida olib qo‘yilgan. Qiziq, voqea 2019-yil 4-dekabr kuni sodir etilgan bo‘lsa-yu, kamera yozuvlari 2020-yil 11-yanvar kuni olingan. Voqeadan bir oyu besh kun vaqt o‘tgach, kamerada yozuv borligi IIB xodimlarining yodiga tushgan bo‘lib chiqadimi shunda?
Viloyat prokuraturasi esa mazkur voqea xususida hozircha hech qanday ma’lumot bermadi.
Izoh (0)