«Гулистон экстракт-ёғ» АЖнинг бир неча йилдан буён акциядорларга дивиденд тўловларини амалга оширмагани ўрганиб чиқилмоқда. Бу ҳақда Ўзбекистон Капитал бозорини ривожлантириш агентлиги маълум қилди.
Хабар берилишича, Капитал бозорни ривожлантириш агентлигига «Гулистон экстракт-ёғ» АЖ акциядорларидан мурожаатлар келиб тушган. Қайд этилишича, акциядорлик жамияти бир неча йилдан буён акциядорларга дивиденд тўловларини амалга оширмаган. Агентлик томонидан ушбу масалани ўрганиш давомида «Гулистон экстракт-ёғ» АЖнинг 2017—2018 йилларда бир нечта акциядорга умумий қиймати 459 миллион сўмлик дивидендларни ўз вақтида тўлаб бермагани аниқланди.
Агентлик компаниянинг миноритар акциядорларига дивидендлар ва пеня ундириб бериш масаласида судга мурожаат қилган.
Гулистон туманлараро иқтисодий суди 2019 йил 26 декабрда «Гулистон экстракт-ёғ» АЖдан жамоа акциядори У.Ж.нинг фойдасига 86,7 миллион сўм миқдорида дивиденд ва 1,2 миллион сўм миқдорида пеня ундириб берилиши бўйича қарор чиқарган.
Ҳозирги вақтда суд компаниянинг дивидендлари ўз вақтида берилмаган бошқа акциядорлар бўйича агентлик томонидан берилган бошқа даъво аризаларини кўриб чиқмоқда.
Изоҳ (0)