Majburiy ijro byurosining Toshkent shahar boshqarmasi va Mirzo Ulug‘bek tuman bo‘limi xodimlari tomonidan Toshkent viloyati Qibray tumani Yuqori-yuz ko‘chasida joylashgan avtomobillarga siqilgan gaz to‘ldirish shoxobchasida energiya resurslaridan qonuniy foydalanib kelinayotganligi yuzasidan tekshiruv ishlari olib borilgan. Bu haqda “Daryo”ga Majburiy ijro byurosi ma’lum qildi.
Tekshirish jarayonida iste’molchi gaz tarmog‘iga ulangan jo‘mragiga o‘rnatilgan muhrlar uzilgan holatda ekanligi va ushbu jo‘mrakdagi nuqtadan gaz sizib chiqib turganligi aniqlangan.
Mazkur shoxobchaga tegishli o‘lchov tizimida o‘tkazilgan metrologik tekshirishda hisobga olish uskunasining ko‘rsatkichi doimiy ravishda tushib borishi qayd etilgan.
Ushbu shoxobchada o‘rnatilgan gaz hisoblash uskunasi navbatdan tashqari ekspert tekshiruvidan o‘tkazilganda, gaz uskunasiga tashqi ta’sir ko‘rsatilganligi holatlari aniqlanmagan. Biroq gaz tarmog‘idan sizib chiqish holatlari tekshirilganda, gaz sizib chiqish holati va bir martalik tamg‘alarga tashqi ta’sir ko‘rsatilganligi aniqlangan.
Tekshirish davomida shoxobcha bilan tuzilgan uzoq muddatli shartnomaning talablari buzilganligi aniqlangan. Shu tariqa shoxobchaning gazdan noqonuniy foydalanishi oqibatida 1,152 milliard so‘m moddiy zarar yetkazilganligi ma’lum bo‘ldi.
Shoxobcha mas’ul xodimlariga 30 kunlik muddatda yetkazilgan moddiy zarar qoplanmasa, ularga nisbatan jinoyat ishi qo‘zg‘atilishi tushuntirilgan. Shundan so‘ng ular tomonidan zarar qoplangan.
Izoh (0)