Мажбурий ижро бюросининг Тошкент шаҳар бошқармаси ва Мирзо Улуғбек туман бўлими ходимлари томонидан Тошкент вилояти Қибрай тумани Юқори-юз кўчасида жойлашган автомобилларга сиқилган газ тўлдириш шохобчасида энергия ресурсларидан қонуний фойдаланиб келинаётганлиги юзасидан текширув ишлари олиб борилган. Бу ҳақда «Дарё»га Мажбурий ижро бюроси маълум қилди.
Текшириш жараёнида истеъмолчи газ тармоғига уланган жўмрагига ўрнатилган муҳрлар узилган ҳолатда эканлиги ва ушбу жўмракдаги нуқтадан газ сизиб чиқиб турганлиги аниқланган.
Мазкур шохобчага тегишли ўлчов тизимида ўтказилган метрологик текширишда ҳисобга олиш ускунасининг кўрсаткичи доимий равишда тушиб бориши қайд этилган.
Ушбу шохобчада ўрнатилган газ ҳисоблаш ускунаси навбатдан ташқари эксперт текширувидан ўтказилганда, газ ускунасига ташқи таъсир кўрсатилганлиги ҳолатлари аниқланмаган. Бироқ газ тармоғидан сизиб чиқиш ҳолатлари текширилганда, газ сизиб чиқиш ҳолати ва бир марталик тамғаларга ташқи таъсир кўрсатилганлиги аниқланган.
Текшириш давомида шохобча билан тузилган узоқ муддатли шартноманинг талаблари бузилганлиги аниқланган. Шу тариқа шохобчанинг газдан ноқонуний фойдаланиши оқибатида 1,152 миллиард сўм моддий зарар етказилганлиги маълум бўлди.
Шохобча масъул ходимларига 30 кунлик муддатда етказилган моддий зарар қопланмаса, уларга нисбатан жиноят иши қўзғатилиши тушунтирилган. Шундан сўнг улар томонидан зарар қопланган.
Изоҳ (0)