«Газ йўқ. Электр узилса, ўтинда овқат тайёрлашади». Вазир ўринбосари — овқати ўтинда тайёрланадиган боғчалар ҳақида

Электр энергияси таъминотида узилишлар кузатиладиган бўлса, болалар боғчалари ҳам ўтиндан фойдаланишга мажбур бўлади. Бу ҳақда мактабгача таълим вазири ўринбосари Шодиёр Маматқулов «Дарё» мухбири Мусулмонбек Иброҳимовга берган интервьюсида айтиб ўтди.

Аввалроқ сенатор Зайниддин Низомхўжаев Ўзбекистондаги 343 та болалар боғчасида овқат тайёрлаш учун ўтиндан фойдаланилаётганини маълум қилганди. Бундай ҳолат Андижондаги 113 та, Фарғонадаги 107 та, Намангандаги 41 та ва Самарқанд вилоятидаги 33 та боғчада аниқланган.

Вазир ўринбосари Маматқуловнинг сўзларига кўра, болалар боғчаларига ўтин сотиб олиш ва уни етказиб бериш учун маблағ ажратилмагани боис сенаторлар ушбу масалага эътибор қаратган.

Барча туман ва шаҳарлар ҳам газ билан таъминланмаган, шу боис мактабгача таълим ташкилот (МТТ)ларида овқат тайёрлаш учун асосан электр печлардан фойдаланилади. Электр таъминотида ҳам баъзида узилишлар бўлиб туради. Шундай узилишлар вақтида МТТларда захира сифатида ўтинга мослаштирилган ўчоқлар ҳам тайёрлаб қўйилган.

Нафақат 343 та боғча, агар электр таъминотида кун давомида узилиш бўлса, бошқа боғчалар ҳам ўтиндан фойдаланишга мажбур бўлади. Сенаторларнинг айнан шу масалага эътибор қаратганининг асосий сабаби — 2019 йилги бюджетда МТТларга ўтин етказиб бериш бўйича маблағ назарда тутилмаган. Эҳтимол, бу режалаштиришдаги бизнинг айбимиздир.

Мактабгача таълим ташкилотларида ўтиндан фойдаланишга барҳам бериш мақсадида болалар боғчаларига суюлтирилган газ-баллонларини етказиб бериш бўйича иш олиб боряпмиз, бу бўйича Вазирлар Маҳкамаси томонидан ҳам топшириқ берилган.

Шунингдек, янги қуриладиган МТТлар лойиҳасига ёзги захира ўчоқли ошхоналарни ҳам киритяпмиз — газ бўлса, газда, электр бўлса, электрда ишлайди. Иккиси ҳам бўлмаса, ўтиндан фойдаланилади. Масалан, Қашқадарё, Сурхондарё ва Самарқанд вилоятларида шундай МТТлар ишлаб турибди.

Шодиёр Маматқулов, мактабгача таълим вазири ўринбосари