Noqonuniy chiqindixonalarga qarshi kurashish maqsadida Davlat ekologiya qo‘mitasi tomonidan Toshkent viloyati Bo‘stonliq tumani tog‘ hududlari hamda Chimyon dam olish maskani hududida nazorat tadbiri o‘tkazildi. Bu haqda “Daryo”ga qo‘mita tomonidan ma’lum qilindi.
Reyd davomida dam olish zonasi hududi, shuningdek, yo‘lbo‘yi va adir atrofiga turli maishiy chiqindilarni tashlagan 4 nafar fuqaro — X.M., Yu.A., S.T., Yu.A. aniqlandi.
Huquqbuzar fuqarolarga nisbatan Ma’muriy javobgarlik to‘g‘risidagi kodeksning 91-moddasi 1-qismi bilan ma’muriy bayonnoma rasmiylashtirilib jarima qo‘llanildi. Fuqarolarga kelgusida bunday huquqbuzarlik holatiga yo‘l qo‘ymaslik, chiqindilarni faqat belgilangan joygagina tashlash lozimligi borasida tushuntirish berildi.
Shuningdek, “Toza hudud” DUKning Bo‘stonliq tuman filiali ishchi-xodimlari va texnikalari jalb qilingan holda hudud o‘sha kunning o‘zidayoq chiqindilardan tozalandi.
Qo‘mita tomonidan ma’lum qilinishicha, bugungi kunda chiqindilarni belgilanmagan joylarga tashlash orqali atrof-muhitni ifloslantirish, noqonuniy chiqindixonalarni vujudga keltirish “illat”ga aylandi. Aholi va yuridik shaxslarning maishiy, qurilish, tibbiy, biologik chiqindilarni belgilangan joylarga tashlamasligi noqonuniy chiqindixonalar paydo bo‘lishiga olib kelmoqda. Sohada olib borilgan monitoring natijalari shuni ko‘rsatdiki, joylarda sanitar va ekologik holat yomonlashuviga chiqindilarni maydonlar, ko‘chalar, sug‘orish tarmoqlari ichiga, suvi muhofaza qilinadigan zonalar, daryo bo‘ylariga, aholining madaniy-maishiy dam olish hududlariga tashlanayotgani sabab bo‘lmoqda.
Avvalroq Tashkent City xiyoboni hududida pista po‘chog‘ini belgilanmagan joyga tashlagan fuqarolar jarimaga tortilgan edi. Shuningdek, Navoiyda va Buxorodagi Markaziy dehqon bozorida pista po‘chog‘i va sigareta qoldiqlarini belgilanmagan joyga tashlaganlar jarimaga tortilgan edi. Bundan tashqari, Namanganda tunda ko‘chaga chiqindi tashlayotgan 6 kishi ham jarima to‘lashga majbur bo‘lgan.
Izoh (0)