Ноқонуний чиқиндихоналарга қарши курашиш мақсадида Давлат экология қўмитаси томонидан Тошкент вилояти Бўстонлиқ тумани тоғ ҳудудлари ҳамда Чимён дам олиш маскани ҳудудида назорат тадбири ўтказилди. Бу ҳақда «Дарё»га қўмита томонидан маълум қилинди.
Рейд давомида дам олиш зонаси ҳудуди, шунингдек, йўлбўйи ва адир атрофига турли маиший чиқиндиларни ташлаган 4 нафар фуқаро — Х.М., Ю.А., С.Т., Ю.А. аниқланди.
Ҳуқуқбузар фуқароларга нисбатан Маъмурий жавобгарлик тўғрисидаги кодекснинг 91-моддаси 1-қисми билан маъмурий баённома расмийлаштирилиб жарима қўлланилди. Фуқароларга келгусида бундай ҳуқуқбузарлик ҳолатига йўл қўймаслик, чиқиндиларни фақат белгиланган жойгагина ташлаш лозимлиги борасида тушунтириш берилди.
Шунингдек, «Тоза ҳудуд» ДУКнинг Бўстонлиқ туман филиали ишчи-ходимлари ва техникалари жалб қилинган ҳолда ҳудуд ўша куннинг ўзидаёқ чиқиндилардан тозаланди.
Қўмита томонидан маълум қилинишича, бугунги кунда чиқиндиларни белгиланмаган жойларга ташлаш орқали атроф-муҳитни ифлослантириш, ноқонуний чиқиндихоналарни вужудга келтириш «иллат»га айланди. Аҳоли ва юридик шахсларнинг маиший, қурилиш, тиббий, биологик чиқиндиларни белгиланган жойларга ташламаслиги ноқонуний чиқиндихоналар пайдо бўлишига олиб келмоқда. Соҳада олиб борилган мониторинг натижалари шуни кўрсатдики, жойларда санитар ва экологик ҳолат ёмонлашувига чиқиндиларни майдонлар, кўчалар, суғориш тармоқлари ичига, суви муҳофаза қилинадиган зоналар, дарё бўйларига, аҳолининг маданий-маиший дам олиш ҳудудларига ташланаётгани сабаб бўлмоқда.
Аввалроқ Tashkent City хиёбони ҳудудида писта пўчоғини белгиланмаган жойга ташлаган фуқаролар жаримага тортилган эди. Шунингдек, Навоийда ва Бухородаги Марказий деҳқон бозорида писта пўчоғи ва сигарета қолдиқларини белгиланмаган жойга ташлаганлар жаримага тортилган эди. Бундан ташқари, Наманганда тунда кўчага чиқинди ташлаётган 6 киши ҳам жарима тўлашга мажбур бўлган.
Изоҳ (0)