Turizmni rivojlantirish davlat qo‘mitasi qoshidagi Samarqand “Ipak Yo‘li” turizm xalqaro universitetining birinchi prorektori Azamat Akbarov xorijda olgan falsafa doktori (PhD) ilmiy daraja diplomi qalbaki bo‘lib chiqqani sababli ishdan olindi.
13-yanvar, dushanba kuni bo‘lib o‘tgan Yoshlar press-klubining navbatdagi sessiyasida Ta’lim sifatini nazorat qilish inspeksiyasi boshlig‘i Ulug‘bek Toshkenboyev turli muhokamalarga sabab bo‘lgan mazkur holatga qisman oydinlik kiritdi, deya xabar bermoqda “Daryo” muxbiri.
“Bu masala Oliy attestatsiya komissiyasi tomonidan o‘rganilgan. Haqiqatdan ham, uning diplomi noto‘g‘ri berilganligi yoki soxta ekanligi izohlangan.
Shuni aytish kerakki, biz hozirgi kunda oliy o‘quv yurtlariga attestatsiya va akkreditatsiyaga chiqib, oliygohlarni baholash mobaynida shu kabi masalalarga alohida e’tibor beryapmiz”, — dedi Ulug‘bek Toshkenboyev.
Ma’lum qilinishicha, Azamat Akbarov Burch (Bosniya va Gersegovina davlati poytaxti Sarayevo shahrida joylashgan) xalqaro universitetidagi professorlik faoliyatini Rossiya tomonidan berilgan diplom asosida amalga oshirgan. Keyin O‘zbekistonga kelganida Burch universiteti taqdim etgan diplom asosida ishga qabul qilingan. Lekin o‘rganish jarayonida aniqlanishicha, Burch universiteti bergan diplom soxta bo‘lib chiqqan va oqibatda Azamat Akbarov lavozimidan ozod qilingan.
“Kelgusida bu kabi holatlarga yo‘l qo‘ymaslik uchun Oliy attestatsiya komissiyasi bilan hamkorlikda ishlarni amalga oshirishimiz zarur”, — dedi Ulug‘bek Toshkenboyev.
Izoh (0)