Germaniya federativ respublikasi kansleri Angela Merkel va Rossiya prezidenti Vladimir Putin 11-yanvar, shanba kuni Kremlda muzokaralar olib bordi. Ikki davlat rahbarining uch soat davom etgan muzokaralarda Liviya va Erondagi vaziyat, shuningdek, “Shimoliy oqim - 2” gaz quvuri qurilishi muhokama qilindi.
Xususan, Merkel “Shimoliy oqim - 2” loyihasini AQSh sanksiyalariga qaramay davom ettirish lozimligini ta’kidlagan.
“AQSh bilan siyosatdagi qarama-qarshiliklarga qaramay hududlararo sanksiyalar to‘g‘ri deb hisoblamaymiz, shu sababli ushbu loyihani qo‘llab-quvvatlashda davom etamiz”, — degan Merkel.
Putin o‘z navbatida, Rossiyaning gaz quvuri qurilishini yakunlash niyatida ekani, bu ishni xorijiy hamkorlar yardamida yoki ularning ko‘magisiz ham amalga oshirmoqchi ekanini bildirdi.
“Muammo muddatlarda emas. Qurilishning yakunlanishi bir necha oyga kechikishi mumkin”, — deya Vladimir Putin so‘zlarini keltirgan “Interfaks”.
Putin gaz quvurining qurilishi 2020-yil oxirigacha yakunlanishi yoki 2021-yil boshida tugashiga umid qilishini aytdi.
Ikki davlat yetakchilari Liviyadagi vaziyatni ham muhokama qilgan.
“Bugun bir necha soatdan keyin Turkiya prezidenti bilan vaziyatni muhokama qilib, Liviyadagi harbiy harakatlarni to‘xtatish borasida bir to‘xtamga kelishimizga umid qilaman”, — degan Putin.
11-yanvarda Putin Turkiya prezidenti Rajab Toyyib Erdo‘g‘on bilan telefon orqali muloqot qilgan va suhbat davomida Merkel bilan uchrashuvdagi mavzular haqida ham fikr almashgan.
Putin hamda Merkel Eronning yadro kelishuvi haqida suhbat qurib, Putin ushbu kelishuvni nafaqat mintaqa balki butun dunyo uchun muhim ahamiyatga ega bitim ekanini qayd etgan. Rossiya va Germaniya Eronning yadro kelishuviga amal qilishi yuzasidan zarur harakatlarni amalga oshiradi.
Angela Merkel avval 2018-yil may oyida Rossiyaga rasmiy tashrif bilan kelgan. O‘shanda u Vladimir Putin bilan Sochida muzokaralar olib borgan.
2018-yil oktabrida Merkel hukmron partiya rahbarligidan ketayotgani va 2021-yilda bo‘lib o‘tadigan saylovlarda kanslerlik uchun nomzodini qo‘ymasligini ma’lum qilgan.
Izoh (0)